احمد الطيب كود الرباط//
بانت الأغلبية، فصباح اليوم الجمعة، ف المناقشة التفضيلية لمشروع قانون المالية لسنة 2025، بلي غير متماسكة، شي كيشرق وشي كيغرب، وزيد عليها ضعف كبير فرؤساء فرق الأغلبية في الدفاع عن حصيلة الحكومة ونتائجها.
اللي عاينتو “گود”، هو بحال محمد شوكي، رئيس فريق الأحرار بمجلس النواب، للي كان رئيس لجنة المالية وتگردع منها بسبب ضعف كفاءتو ومافيدوش فالسياسة، اليوم باغي يبان بلي كيدير السياسة عن طريق حشيان الهضرة لزميلو فاللجنة عبد الله بوانو.
مشكلة شوكي باغي يقلد سياسيين ثقال دازو فهاد اللجنة وكانو ديما كايديرو جدل ونقاش سياسي قوي، ولكن معارفش ومافيدوش، بحال الغراب لي باغي يقلد مشية الحمامة ومشات ليه المشية ديالو.
شوكي ومعه رئيس فريق البام احمد التويزي، كيتخباو مور سيدنا، وهضرتهم كلها هاد البرنامج ديال سيدنا وهذا ديال سيدنا ووو، في حين أنه مثلا إعادة إعمار مناطق زلزال الحوز كان فيه تعثر، برنامج دعم السكن تعطل وتبلوكا وغيرها…
فهاد اللجنة، كاين جوكير واحد كيدافع على الحكومة بقوة وبالسياسة والاقتصاد والأرقام، هو فوزي لقجع الوزير المنتدب المكلف بالميزانية، أما وزيرة المالية فهي ضعيفة فالتواصل السياسي ومكتقدرش تعطي أجوبة بسرعة وبلا متقرا من الورقة. هاد الوزيرة كيعطيوها حتى الردود مكتوبة.
