كود – سبتة//

المحكمة الكبيرة  فمليلية دارت قرار نهائي ورفضات ترجع تمثال ديال فرانسيسكو فرانكو اللي كان تحيد من 2021، هاد القرار دعم الخطوة ديال المدينة اللي جات فإطار قانون الذاكرة التاريخية ديال إسبانيا.

المحكمة قالت بلي الإزالة ديالو كانت قانونية، حيث التمثال تدار ف1977 فظروف كيتفهم منها أنه كان فيه نوع من تمجيد لشخصية فرانكو، وهاد الشي ممنوع حسب القانون اليوم، وزادت المحكمة وقالت إن النظام الديمقراطي كيسمح بتعدد الآراء، ولكن ما يقدرش يعطي الشرعية لأفكار كتخالف مبادئُ.

الجهات اللي كانت كتعارض الإزالة قالت إن التمثال ماشي هدفو تمجيد الديكتاتورية، ولكن تكريم لدور فرانكو كقائد عسكري فالفيلق عام 1921 فدفاعُ على مليلية .

المحكمة رفضات هاد الكلام ، وقالت بلي ما كاينش دليل كافي يثبت أن التمثال رمزي و بريء، ولكن كاين سياق  فيه تمجيد، وزادت وضحات أن التمثال ما عندوش تصنيف رسمي كتراث محمي، وبالتالي تحيادو ما فيهش  مشكل.

فالأخير،المحكمة ثبتات القرار ديال المدينة وغلّقات الباب قدام إعادة نصب التمثال فبلاصتو فين كان.