كود – عن لوباريزيان //

بينات جريدة “لو باريزيان” الفرنسية، فعددها لبارح 15 فبراير، على معلومات جديدة متعلقة بالريزو ديال جيفري إبستين، اللي كان متهوم بتسيير شبكة للدعارة واستغلال القاصرات فديورو وجزيرتو لي ارتكب فيهم  جرائمو الجنسية ،التقرير هضر على واحد السيد من أصل جزائري عندو الجنسية السويسرية، سميتو دانيال صياد، اللي مشكوك فيه  كان “قوّاد” كيحيب البنات باش يوريهم لإبستين، هاد المعلومات جات من شكاية دارتها سيدة مغربية عندها الجنسية الفرنسية، سميتها مليكة، اللي عاودات للبوليس كيفاش حاول يستغلها ويجيب بنات آخرين من المغرب.

حسب الجريدة، اسم “صياد“ مذكور فـكثر من 1000 صفحة من الوثائق اللي خرجاتهم وزارة العدل الأمريكية، وكيبان فيها بلي كان كيلعب دور “وسيط” باش يطيح البنات لإبستين، اللي تحكم عليه فملفات ديال الاعتداء الجنسي على القاصرات، وبينات الوثائق  بلي سميتها كان مسجّل فلوائح الرحلات الخاصة ديال إبستين عاك 2019، وكانت سافرت معاه فطائراتو الخاصة من مطار لوبورجيه.

مليكة قالت للمحققين الفرنسيين بلي صياد كان “سمسار ديال البنات” كيخدم مع إبستين لأغراض جنسية، حسب شهادتها، تعرّفات على صياد فباريس عام 2013، بسبة عرض الأزياء، قال لها بأنه عندو وكالة ديال الموديلينغ وطلب منها تبعث ليه مساح باش يتلاقاو، من بعد عرضها لبرطمة كبيرة فحي فوش، وعرّفها على واحد الشخص اللي قال لها: “أنا جيفري إبستين”.

مليكة كتقول بلي دخلات فواحد الجو عامر بالإشارات الجنسية، مليكة سافرات مع إبستين فشحال من رحلة، حتى ولات كاتسكن فواحد الشومبر عندو فباريس عاك 2017، كتقول مليكة: “كان باغيني نكون ديالو وتحت طوع يديه، وكنت كنحس براسي ديالو”.

وزادت بلي صياد كان كيوريها  صور ديال دريات مغربيات، ويسولها واش غادي يعجبو إبستين ولا لا، باش يجيبهم لي كان كيسمّيه “ݣلسات ديال المساج”، اللي تبيّن من بعد أنها غير واجهة للاستغلال الجنسي.

وقالت: “كان باغيني نعاون نلقا بنات باش يخدمو مع إبستين فالمساج ولا الدعارة، وكنت كنرفض حيث ما بغيتش شي بنت خرى تعاني”. ووصفات صياد بأنه “صياد ديال البنات”.

التقرير قال بلي بأن هاد المحاولات وصلات حتى للمغرب، مني تلقات مليكة مع صياد سنة 2017، وعاود طلب منها تعاونو باش يقنع دريات مغربيات يمشيو يتلاقاو مع إبستين.

خطورة هاد الاتهامات وظهور اسم مليكة فملفات السفر ديال إبستين علم بها  القضاء الفرنسي لي مازال ما سمعش لصياد حتى دابا، من جهتو صياد ردّ فسوشلميديا وقال بلي الخدمة ديالو كانت “مهنية” وما كانش عارف بالجرائم اللي كانت كتوقع، وعبّر على استعدادو يواجه العدالة.
https://www.leparisien.fr/faits-divers/affaire-epstein-quand-une-victime-francaise-decrivait-daniel-siad-devant-la-police-comme-un-rabatteur-de-femmes-14-02-2026-B2UISEI5OVE2RB5VR3AAGYCUUE.php