كود الرباط//

علمت “گود” أن الصداع لي نايض وسط جمعية الأعمال الاجتماعية بمجلس المستشارين، خصوصا بين رئيسها المقرب من حزب الاستقلال والكاتبة العامة، سببه الرئيسي هو المليار ونصف المبلغ اللي كان شاط من مساهمات المستشارين السابقين بعد إلغاء صندوق تقاعد البرلمانيين، وتم اتخاذ قرار تحويل المبلغ لجمعية الأعمال الإجتماعية لموظفي مجلس المستشارين.

وحسب مصادر “گود”، فإن الكاتبة العامة دعت للجمع العام لانتخاب مكتب جمعية الأعمال الاجتماعية يوم الخميس 14 مارس 2024، هادشي لي دفع برئيس جمعية الأعمال الاجتماعية يدير بيان ويعتبر هاد الدعوة للجمع غير شرعية وصادرة عن أيادي معندهاش الصفة.

مصادر “گود” وضحات بلي المشكل هو أن الموظفين دابزو بيناتهوم على شكون يكون فمكتب الودادية السكنية باش يدبر المليار ونصف، وهاد الشي علاش ناضو شي وحدين منهم، مدعومين بالنقابة ديال الموظفين اللي كيرأسها واحد الموظف (كتروج عليه شبهة موظف شبح) واللي ما بقاتش قانونية هادي سنين بحكم أنها ما عقداتش جمعها العام، باش يديرو جمع عام ديال جمعية الأعمال الإجتماعية اللي حتا هي مابقاتش قانونية هادي سنوات حيث مادارتش الجمع العام ديالها.

الكاتبة العامة ديال الجمعية دارت الشغل بيديها ودعات للجمع العام واخا ما عندهاش الصفة القانونية، وهي مدعومة بمكتب الودادية الجديدة.

هاد الخالوطة جالوطة واقعة فمؤسسة تشريعية اللي كتشرع القوانين ديال لبلاد والحرب شاعلة بين أطراف حول المليار ونصف اللي كتسيل اللعاب ديال اللي شادين خطوط هاد اللعبة.

هاد الشي واقع فالغرفة الثانية اللي كتعرف شبهات كثيرة: ها مارشيات الإصلاح، ها كراء عمارة جديدة، ها وكالة سياحية للسفريات والمؤتمرات والندوات، ها التوظيفات لمقربين من أعضاء المجلس ومن المسؤولين الإداريين، وزيد وزيد.

وبالعودة لهاد المليار ونصف، قال مصدر لــ”گود” بلي المبلغ خاصو يدخل لمؤسسة الأعمال الاجتماعية لموظفي البرلمان، ويكون بالقانون.

ولكن الغريب يقول مصدر “گود”: “باش ما يتمش تقاسم هاد المبلغ بين موظفي مجلس المستشارين وموظفي مجلس النواب بعد إحداث مؤسسة الأعمال الاجتماعية لموظفي البرلمان، ناض مجلس المستشارين جمد مسطرة المصادقة على مقترح القانون المتعلق بهذه المؤسسة اللي غادية تعوض الجمعيتين، ديال موظفي مجلس النواب وديال موظفي مجلس المستشارين”.

واضاف ذات المصدر :”هاد الشي علاش دار رئيس مجلس المستشارين اجتماع ديال موظفي المجلس هادي شهر وطلب منهم يسرعو بتشكيل ودادية سكنية خاصة بيهوم باش يحولو ليها مبلغ مليار ونصف ويديرو مشروع سكني للموظفين”.

هاد المليار ونصف هو المبلغ اللي كان شاط من مساهمات المستشارين السابقين بعد إلغاء صندوق تقاعد البرلمانيين، وتم تحويل المبلغ لجمعية الأعمال الإجتماعية لموظفي مجلس المستشارين اللي كيرأسها استقلالي مقرب من النعمة ميارة، رئيس المجلس.