كود ـ مراكش//

كتعيش مراكش هاد ليام عراسية كبيرة ديال واحد الملياردير هندي بحال داكشي اللي ولفات تستقبلو المدينة كيف العادة.

وحسب معطيات محلية كان من بين الحضور النجم العالمي شاروخان، ومعاه مجموعة من نجوم السينما والغنا فالهند، وزيد عليهم شخصيات معروفة من مجالات مختلفة، الجهة المنظمة خلات الحضور ديال الشخصيات المعروضة والنجوم يكون سري ومحسوب فتحركاتهم.

وبينات مصادر محلية أن بزاف ديال الضيوف المهمين مشاو لوطيلات مصنفة، لي من بينها Royal Mansour، و The Oberoi و Kasbah Tamadot فالحوز، زيد عليها عدد من دور الضيافة اللي تجهزات لاستقبال الضيوف.

وأول فقرات العرس بدات الثلاث بالليل، مني سمعو سكان المحاميد والشريفية صوت (المفرقعات والشهب الاصطناعية) فواحد الأجواء احتفالية كبيرة، الشي لي خلا بعض الساكنة تخلع قبل ما يعرفو بلي غير العرس .

وكتأكد نفس المصادر أن هاد العرس الكبير كتنظمو شركة متخصصة فتنظيم الأعراس العالمية، أما السلطات المحلية فمراكش فكانت واجدة من قبل، ودارت اجتماعات باش تريگل الجوانب الأمنية واللوجستيكية.

https://www.facebook.com/share/r/1B825JrQaR/

المصادر قالت إن الملياردير المعني هو مسؤول كبير فشركة Coca-Cola فالهند وجنوب شرق آسيا، واختار يدير العرس ديالو وفق التقاليد الهندية، اللي عطاتو واحد الطابع ثقافي مْيز، وزادت عليه لمسة ديال الفخامة المراكشية.