كود الرباط//

صورة معبرة عن علاقات المغرب باسبانيا، خرجات من منتدى “مستقبل البحر الأبيض المتوسط” ف مدينة غرناطة الإسبانية، وكتعبر على لحظة فيها بزاف ديال الدلالات السياسية والرمزية. ملك إسبانيا، فيليبي السادس، بان ف الصورة كيهضر مع رئيس مجلس النواب المغربي، راشيد الطالبي العلمي، وكيبتسم ليه بطريقة كتدل على تقدير خاص للمغرب.

اللقاء جا على هامش المنتدى الدولي المنظم ف إطار الرئاسة الدورية الإسبانية للجمعية البرلمانية للاتحاد من أجل المتوسط، واللي كيشهد مشاركة وازنة للمغرب من خلال وفد برلماني كيرأسو الطالبي العلمي، اللي هو حتى هو نائب رئيس الجمعية ورئيس اللجنة الثقافية داخلها.

المنتدى كيناقش ملفات عندها وزن ثقيل بحال الهجرة، والتغير المناخي، وتشغيل الشباب، والمساواة، لكن اللحظة اللي وثقتها الكاميرا كتقول بزاف على مكانة المغرب ف المنطقة، وعلى العلاقة الخاصة اللي كاتجمع البلدين، رغم كل ما كيعرفوها من فترات شد وجذب.

مصدر قال لـ”گود” بللي ملك إسبانيا عبر عن ارتياحو الكبير للحضور المغربي القوي، وكاين تنويه خاص بالدور اللي كيلعبو البرلمان المغربي داخل الجمعية،  مضيفا بلي حضور الطالبي العلمي عندو رمزية وتقدير للجارة الاسبانية، حيث يعد ثالث مسؤول في هرم الدولة.

الصورة اللي تجمع فيليبي السادس والطالبي العلمي ماشي غير بروتوكول، بل هي رسالة واضحة: المغرب دولة شريكة وعظيمة ، وحتى ف السياسة كاين تقدير كبير.

المغرب واسبانيا نموذج كبير فالتعاون الدولي فمجالات الهجرة والامن، وكثر حتى ما هو انساني، ف فيضانات دانا لي ضربات فالنسيا وعدد من الاقاليم، بان الحضور القوي لرجال الوقاية المدن المغربية والعمال لي ساهمو في انقاذ فيلاجات كثيرة من الغرق والوحل ونقاوها.