كود ـ كازا//

أجلات الغرفة الجنائية الاستئنافية فمحكمة الاستئناف فكازا، اليوم الأربعاء 10 دجنبر، النظر فملف مقتل الشاب/المهندس “بدر بولجواهل”، اللي مات فصيف 2023 فمرآب ديال واحد الريسطوران معروف فكازا.

التأجيل مشى حتى للعام الجاي، وبالضبط 12 يناير من العام 2026، حيت واحد من المتهمين ماكانش عندو محامي فالجلسة.                   الأمر كيتعلق بالمتهم (أمين.ر)، اللي كان محامي معلن أنه غادي يدافع عليه، ولكن تغيب اليوم. وهادشي خلا رئيس الهيئة يطلب من نقيب هيأة المحامين فكازا، محمد حيسي، يعين ليه محامي فإطار المساعدة القضائية باش المحاكمة تكمل فظروف قانونية صحيحة وبحق الدفاع مضمون.

وكانت غرفة الجنايات الابتدائية حكمات على المتهمين بـ:

الإعدام للمتهم الرئيسي أشرف.ص المعروف بـ”ولد الفشوش”، بعدما تتابع بجناية القتل العمد مع سبق الإصرار، ومحاولة القتل، والسرقة المقترنة بظروف الليل والتعدد واستعمال العنف، وزيد عليهم جُنح أخرى.

المؤبد للمتهم أمين.ر اللي اعترف بأنه هو اللي كان سايق الطوموبيل ودهس بدر عوض المتهم الرئيسي.

25 عام ديال الحبس النافذ للمتهم عبد الرفيق.ز.

20 عام للمتهم أحمد.س.

5 سنين للمتهم حميد.ع، اللي هو صهر المتهم الرئيسي، واللي تكلف بنقل المتورطين للعيون بعد الجريمة.

القضية كيتابع فيها خمسة ديال الأشخاص، كانوا بانو ف فيديو متداول كيوثق لحظة تصفية الضحية عن طريق دهسو بالطوموبيل. المتهمين تشدو فمدينة العيون، اللي مشاو ليها فمحاولة للهروب للخارج، بعد حوالي 35 ساعة من وقوع الجريمة.

الجلسة الجاية غادي تكون فـ12 يناير، من بعد ما يتعين محامي للمتهم اللي بقى بلا دفاع.