كود ـ كازا//

ملف “إسكوبار الصحراء” وصل للمراحل الأخيرة ديالو، بعدما عرضات النيابة العامة قدام غرفة جرائم الأموال فمحكمة الاستئناف فكازا، اليوم الخميس 13 نونبر، مرافعتها القوية، وطالبت فيها بإدانة جميع المتهمين ومصادرة الفلوس والممتلكات اللي جايا من تجارة الممنوعات.

ممثل الحق العام قال باللي الوقائع كلها كيربطها خيط واحد، كيبين وجود شبكة منظمة كتخدم فالاتجار الدولي فالمخدرات، وذكر بأن القضية ماشي معزولة، بل جزء من سلسلة ديال ملفات فيها عمليات تهريب كبيرة وصلات حتى لـ40 طن ديال الحشيش.

النيابة العامة فسرات كيفاش الأبحاث طاحت على متورطين جداد بعد توقيف واحد المشتبه فيه فالجديدة، وأكدات أن الإثبات واضح من خلال محاضر الضابطة القضائية والإقرارات ديال المتهمين، اللي جاو منسجمين فالتفاصيل، وزادت باللي 77 كيلو ونص من الشيرا وطائرة درون وصفائح أجنبية كلها أدلة كتثبت التورط.

وطالبت النيابة بتطبيق القانون وفق الظهير ديال 1974، اللي كيعاقب على الحيازة والاتجار والتصدير، مع رفض دفوع التقادم اللي قدمها الدفاع، حيث ما كملاتش المدة القانونية.

القضية دابا فمرحلة الحسم، ومقرر فالجلسات الجاية الدفاع يعرض مرافعته قبل ما المحكمة تنطق تدرج الملف في المداولة وتصدر الأحكام ديالها في ملف كا يتابعو فيه سياسيين ورجال أعمال، وأثار الكثير من الهضرة والجدال القانوني والمجتمعي.