كود أكادير//

دخلات أشغال تأهيل ملعب أكادير الكبير مراحلها الأخيرة، باش يكون واجد لاحتضان مباريات كأس أمم إفريقيا اللي غادي تنطلق بعد أيام قليلة، وذلك بعد سنة كاملة ديال الإصلاحات اللي كلفات 40 مليار سنتيم.

الأشغال ما اقتصرتش غير على تهيئة المستودعات والمرافق الصحية، ولكن شملت تجهيزات جديدة كالبانيوهات الكبيرة للتبريد والتعافي ديال اللاعبين، قاعات للتدليك والعلاج الطبيعي، مراحيض عصرية مطابقة لمعايير الولوجيات، ممرات واسعة تحت أرضية مجهزة بالتهوية والإنارة، وكافيتيريا حديثة للضيافة.

أما مستودعات الملابس فتبدلات بشكل كامل، وولات أكثر عصرية واتساع،الكراسي المريحة، إضافة لمرافق خاصة للاستحمام والاسترجاع.

المعطيات الرسمية تفيد أن المرحلة الجاية بعد الكان غادي تشمل تسقيف الملعب وإزالة مضمار ألعاب القوى، وزيادة الطاقة الاستيعابية من 41.800 مقعد لـ 46 ألف مقعد، باش يكون مطابق للمعايير اللي كتحطها الكونفدرالية الإفريقية لكرة القدم.

هاد الإصلاحات كتدخل فإطار سياسة المغرب لتجديد وتعزيز البنيات الرياضية الكبرى، تحضيراً لموعدين كرويين كبار هما كان 2025 ومونديال 2030.