وكالات//

رواد مواقع التواصل الاجتماعي رجّعو يتشاركو واحد الفيديو قديم ديال ميلانيا، اللي هي الزوجة ديال الرئيس الميريكاني دونالد ترامب، وللي كتكشف فيه على الروتين ديال الليل ديالو.

ترامب كان قبل كيتفاخر بأنه كينعس غير 4 حتى لـ5 دالسوايع فالليل ملي كان رئيس فـ البيت الأبيض، وهاد الشي كيتعتبر عادي عند بعض القادة اللي كيركبو راسهم بزاف فشغل الدولة وما كيرتاحوش مزيان.

وحتى دابا باقي ما معروفش شحال كينعس فعلاً، ولكن ميلانيا كانت هضرات فالحملة الانتخابية على العادة ديالو فالنوم، فبرنامج “ذا فايف” اللي كيدوز فـ قناة “فوكس نيوز” وهي كتروج للكتاب ديالها “ميلانيا: مذكرات”.

وقالت ميلانيا فالمقابلة: “هو ما كينعسش بزاف”، وزادت: “طبعاً كينعس، راه خاصّو ينعس”، ومنين سولوها واش كينعس ببيجاما، جاوبات: “لا”، وما بغاتش تزيد فالتفاصيل.

الإعلام حتى هو تكلم على طريقة النوم الغريبة ديال ترامب خصوصاً ملي كيسافر. الصحافية كايتلان كولينز، اللي كانت مراسلة فـ “سي إن إن”، قالت فبودكاست Trading Secrets  إنها سمعات من مصادر بأن التعامل مع مواعيد النوم ديالو فالسفر كان صعيب، خصوصاً فالرحلات الطويلة.

وقالت: “هو ما كينعسش فهاد الرحلات، حتى إلا كانت طويلة لآسيا، وكينوض يهدر مع الفريق، وحتى كينوض الموظفين اللي ناعسين باش يهدر معاهم”، وزادت بأن ترامب غالباً كيبقى يتابع الاجتماعات أو كيدير خطط على حسب شنو كيشوف فالإعلام، وهاد الشي كيجبر الناس اللي خدامين معاه يبقاو فايقين فالسوايع اللي ما متوقعاش.