كود الرباط//

قال مصطفى بايتاس، الناطق الرسمي باسم الحكومة، بأن 60 في المائة من الاسرة المغربية المستهدفة بالدعم الاجتماعي تستفيد من تعويضات عائلية مباشرة عن الأطفال أو تستفيد من منحة الدعم المباشر 500  درهم، حيث خصصت 25 مليار درهم خلال سنة 2024 لهذا الدعم.

وأوضح بايتاس، اليوم في ندوة مجلس الحكومة، أن هاد 60 في المائة من الأسر كانت تستفيد من 2015 حتى لـ2023، من مبلغ 8 ملايير درهم سنويا في إطار صندوق المقاصة، في المقابل الفئات الميسورة والغنية تستفيد من 12 مليار درهم سنويا خلال نفس الفترة.

وأكد بايتاس، أنه اصبح واضحا اليوم، ان الفئات اللي كتستفد بشكل اقل من الدعم خلال دعم المقاصة، اليوم انتقلت للاستفادة بشكل دقيق من الدعم سواء من خلال التعويضات العائلية عن الأطفال واللي غاتوصل لـ300 درهم عن كل طفل سنة 2026.

بايتاس كيخلط فالارقام، مقالش رقم محدد للعدد لي استفد بشكل مباشر من 500 درهم ولا العدد المحدد بالنسبة للي مستفدين من تعويضات عائلية. فالوقت للي صافي البوطا شعلات فالسوق وكولشي كيهضر على الغلاء.

وأوضح المتحدث: “خدينا الإمكانيات الكبيرة ف25 مليار درهم ووجهناه بشكل مباشر لمن يحتاجها، شحال ديال الانعكاسات لي غاتكون عليهم فالمتوسط مغاديش تجاوز 27 حتى لـ50 درهم، فالمقابل كتشوف الامتيازات والإمكانيات اللي غايتسفدو منها كبيرة” هنا كلام بايتاس مواضحش كاع واش كيقصد بلي الأسر غاتخسر بين 27 و50 درهم فزيادة البوطا وفالمقابل غادي تستفد من دعم مباشر.

وبخصوص الأرامل التي تعيل الأسر ديالها، قال بايتاس: “كيبلغو 300 ألف أسرة، وكيستفدو من 350 درهم وغايطلع لـ400 درهم شهريا فهاد العام 2024”.

وأضاف بايتاس: “مندوبية التخطيط تقول بلي عدد المسجلين 11.5 أسرة عندهم التغطية الصحية”، مشيرا إلى أن “2 مليون أسرة تستفيد من التأمين الإجباري عن المرض إما موظفون أو متقاعدون، و5 مليون أسرة تستفيد إما أجراء أو متقاعدون من نظام CNSS وكيشتغلو فالقطاع الخاص، بقات 3.8 مليون أسرة فنظام أمو تضامن وكتبقا 700 ألف هوما العاملين غير الإجراء في المهن الخاصة ودبا ولات عندهم إمكانية”.

بايتاس مكيعرفش يشرح ويفرز وكيبقا يدور بين الأرقام حتى كيدوخ للي فاهم واللي مفاهمش.

60 في المائة من الأسر المغاربة كتعيش الفقر على هاد الحساب، يعني أغلب الأسر المغربية مفحالهاش وهذا تحدي ديال الدولة الاجتماعية لي بغات الحكومة تنزلها. وهادشي خصو المزيد من الوضوح بلغة الأرقام والشرح هادشي مكيعرفش ليه الوزير الحاج بايطاس. من الأحسن يجيبو مسؤول كيعرف يشرح هاد التوجه الاجتماعي للدولة، وهادي الوقت المناسبة باش خصو يتعفا.