محمد سقراط كود ///

واش منستاحقوش رئيس حكومة عندو شهادة أكاديمية ؟ طبعا نستحقوه حنا مغاربة أذكى شعب فالعالم ، ولكن واش الشهادة الأكاديمية فالتاريخ السياسي عمرها كانت عندها قيمة بالنسبة للسياسين وعمرها كانت بصح شي اظافة حقيقية بالنسبة ليهم ، وكاين عدة أكادميين مرموقين ترشحوا فالإنتخابات الرئاسية وخسروا ومنهم ماريو باراخاس يوسا لي ترشح ضد فوجي موري الياباني وربحوا فالبيرو ، السياسة راه فن ، وهاد الفن مكيتقراش فالمدارس اييه راه يمكن يكونوا عندك شواهد فهادشي ولكن يالله تحتاجهم تكون على رأس حملة شي مرشح رئاسي أو شي مستشار ، أما السياسة والقيادة كتبغي فن الخطابة والكاريزما وماشي الشهادة.

شناهو لي مستهجن فالهدرة ديال نبيلة منيب ولي الرد ديال الياس عليها بان بحال شي نص مقدس ، هو أن هاد الهدرة خارجة من فم وحدة كتقول على راسها يسارية وزعيمة حزب فيدرالية اليسار كاع ، في تغابي مطلق وتعامي من قبلها على قيم اليسار كيفاش كاينة فالعالم، وحتى على التاريخ ديال قادة اليسار لي كانوا كيخلعوا أنظمة على قدها وبلا شهادات جامعية ، سطالين ومعندوش وجراو عليه من أغلب المدارس لي قرا فيها ، هنا فين كيبان أن حتى اليسار مدرح فهاد البلاد كباقي التيارات الأخرى ، وهنا فين كيبان التقوقع الطبقي المباشر للرفيقة نبيلة ، وفتصريح غير محسوب العواقب من طرفها كتخلى على موقعها الطليعي وكتخلص من عملية الإنتحار الطبقي لي دايراها من أجل أنها تكون مثقفة عضوية تقدر تقود الطبقة الكادحة المستلبة حسب المفاهيم اليسارية ، كتخرج طاطا نبيلة بتصريح كولونيالي كتنتاقد فيه الياس من موقع طبقتها الإجتماعية والفرصة لي تاحت ليها باش تقرى فبلاد كيحدد فيها موقعك الطبقي الكثير فحياتك ومستقبلك .

وحتى تاريخ المغرب العريق لي كتدوي عليه واش كتهدر على تاريخ ملوك المغرب والدول لي قامت فيه وللى تاريخ الأسر الموريسكية العتيقة لي جات قارية من الأندلس وتقلدات مقاليد الحكم ، راه تاريخنا فيه ملوك محاربين أسسوا لدول بالقوة والحرب والدهاء السياسي ، وماشي تاريخ قيادات أكاديمية ، أييه مكرهناش رئيس حكومة عندو شهادات أكاديمية ، ولكن من باب آش واش الإستئناس أو الإستعراض أمام العالم ، حيث بهاد الهدرة بحال الى بنادم بصح بدا يتيق بأن رئاسة الحكومة كتحكم بصح هاد البلاد ، وأن شخص رئيس الجكومة كل ماكان مناسب كل ما تحسن الوضع الإقتصادي والإجتماعي والإقليمي ديال المغرب ، هادشي راه حلامة كتحلمها طاطا منيب خاص لي يفيقها منها وكنظن أنها هي وحنا وكولشي عارف شكون كيحكم هاد البلاد السعيدة وشكون لي فيدو القرار الحقيقي ، أما يطلع رئيس قاري أو ماقاريش فمازايدة مناقصة وموحال يكون عنجها تأثير على الواقع المعاش للمغاربة .