گود سبور//

كايحاول المكتب المديري للوداد الرياضي يلقى حلول للاعبين اللي خارج مفكرة المدرب أمين بنهاشم، بعدما تبين انهم ماشي بقيمة الفريق الأحمر، فالوقت اللي الرئيس العرباز هشام آيت منا، گاعما مسوق وگالس يدير انتدابات جديدة كايشوفوها بزاف من الوداديين عشوائية حيث خدام فيها بلا إدارة تقنية وغراضو منها يسكت الجمهور ويبقى رئيس.

وحسب مصادر مطلعة، فالمكتب المديري للوداد الرياضي ساخط على الطريقة اللي كايسير بها هشام ايت منا النادي، والسماسرية اللي كايتعامل معهم، واللي غرقو الفريق بلاعبين ماشي بقيمة الحمرا، وناضو اعضاء من المكتب كايحاولو يلقاو شي حلول باش يعتقو إلى مازال شي حاجة ما تعتق قبل بداية الموسم الجاي.

نفس المصادر وضحت، أن من بين الملفات اللي كايحاول يعالجها المكتب المديري للوداد الرياضي، هو الضوسي ديال الثنائي البرازيلي بيدرينيو وارتور اللي واخدين عطلة دابا، وكايحاولو يلقاو لهم شي عروض باش يصيفطوهم بحالهم، والنادي يخرج بأقل الأضرار معهم، حيث إلى بغاو يتفارقو معهم خاصهم يخلصو لهم الشرط الجزائي، أما هما بجوجهم ما عينيهمش يمشيو بحالهم حيث مرتاحين ومخلصين واخا النيفو ديالهم ماشي ديال الوداد، وهذا الصفقة الخاسرة تسبب فيها ايت منا ملي جابهم الصيف اللي فات من البرازيل هو والمدرب السابق رولاني موكوينا وتم الترويج لهم على انهم بجوج شي كوايرية نيت، ولكن بان من بعد موسم واحد دوزوه فالواك انهم ضعاف.