كود – عثمان الشرقي  //

بعدْ غياب طْويل على الساحة الفنية، رجعات الفنانة هدى بشكل مفاجئ مورا تساؤلات كثيرة كانت كتدور على مصيرها الفني ، العودة ديال هدى كانت من مدينة بني ملال مني التحقات بفرقة الفنان عبد العزيز أحوزار، فخطوة ما كانتش متوقعة ولكن لقات ترحيب كبير من طرف الجمهور الملالي لي احتفل بها كيف ما خطفات هدى كرة أخرى الأنظار من جديد.

الحفل اللي تزامن مع هاد الرجوع عرف حضور جماهيري غفير، وخا التدكرة وصلان حتى ل 250 درهم للبلاصة ، أما الجمهور  مقدرش يصبر وبدا كيغوت بشكل هيستيري : “هودى.. هودى. هودى”، فمشهد كيبين الشوق الكبير لرجوعها مورا غياب دام مدة طويلة كيف ما كيبين مدى حب الشباب للشيخات والفن .

وفوق المنصة، تألقتت هدى بإطلالة زوينة وحضور قوي، وقدّمت عرض فني عامر بالحيوية والشطيح، وسط تفاعل كبير من الحاضرين، الابتسامة ديالها وفرحتها بالرجوع كانوا باينين بزاف، وما قدراتش تخبي التأثر ديالها بهاد الاستقبال الحار.

السهرة دازت فأجواء حماسية، وسط حراسة محكمة دايرة بالشيخات ، كما عرفات السهرة إقبال كبير خلا مداخيل الحفل توصل لمستويات مهمة، وهاد الشي كيبين باللي الشعبية ديال هدى والشيخات واحوزار مازال حاضرين بقوة لدرجة الغرامة بقات غير كتشاير فالسما.

من جهتو رحّب عبد العزيز أحوزار للݣود بعودة هدى، وعبّر على الفرحة ديالو بمشاركتها فالحفل، كيف ما أكد باللي أول ظهور فني ديالها كان معاه وكيشوف رجوعها خطوة مهمة فالمسار ديالها.

وضاف أحوزار فتصريح لـ“كود” أنه كيشكر بزاف الجماهير اللي مشجعاه وواقفة معاه، وأكد باللي غادي يكمل فالمسيرة الفنية ديالو بنفس الجدية والانضباط، وانه كيرحب بالرجوع ديال هدى  وانه كيقول ليها مرحبا بك.

وكشف احوزار لگود حتى على السر ديال الشباب ديالو، وقال باللي نمط العيش القروي اللي كايعيش فيه، مع المداومة على الرياضة، هما اللي مخليينو محافظ على الحيوية ديالو.

كما رجع مع كود بالبدايات ديالو فالميدان، وتكلم على التحديات اللي داز منها حتى وصل لهاد المستوى”باقي تفاصيل الحوار غادي يتنشر فيديو  لاحقاً فالموقع“

ناقد فني صرح لگود بأن السهرة ديال لبارح فيني ملال بينات شحال الجماهير المغربية عزيز عليها النشاط والموسيقى والحيحة ، الشي لي كيبين إقبال كبير على الحياة وعلى الفعاليات الفنية والثقافية المنظمة فبني ملال وباقي المغرب.