الرئيسية > كود سبور > مكافأة للعابا ديال المغرب حيث قصاو إسبانيا وتأهلو لربع نهائي كأس العالم
07/12/2022 12:04 كود سبور

مكافأة للعابا ديال المغرب حيث قصاو إسبانيا وتأهلو لربع نهائي كأس العالم

مكافأة للعابا ديال المغرب حيث قصاو إسبانيا وتأهلو لربع نهائي كأس العالم

كود سبور//

غادي يستافدو اللعابا ديال المنتخب الوطني المغربي من عطلة استثنائية من بعدما ربحو إسبانيا فثمن نهائي كأس العالم قطر 2022، وحققو تأهل تاريخي لربع نهائي المونديال.

وقرر الناخب الوطني وليد الركراكي والطاقم التقني يعطيو مكافأة  للعابا ديال المنتخب الوطني المغربي من بعد الماتش البطولي اللي دارو قدام إسبانيا واللي سالاوه بتأهل تاريخي لربع نهائي كوب ديموند، ومنحوهم يوم راحة.

وماغاديش يتدرب المنتخب الوطني المغربي اليوم الأربعاء باش يرتاحو اللعابا ويرجعو الأنفاس ديالهم ويبدلو الجو شويا، خصوصا أن الماتش ديال البارح مشى حتى الأشواط الإضافية والبيلانتيات، الشي اللي كايعني أنهم محتاجين يرجعو الطاقة اللي خسروها بسبب المجهود البدني اللي دارو فالماتش.

وكتعرف الصفوف ديال المنتخب الوطني المغربي عدد كبير من الإصابات، الشي اللي كايعني أن الطاقم الطبي بقيادة عبد الرزاق هيفتي إلى جانب المعدين البدنيين كتسناهم خدمة كبيرة فهاد اليومين اللي جايا باش يوجدو اللعابا لربع نهائي كأس العالم قطر 2022، وبالنسبة لوليد الركراكي والطاقم التقني ديالو فغادي يكونو مطالبين يلقاو الحلول والبدائل فحالة تأكد غياب أحد اللاعبين ضد البرتغال.

ومن المنتظر يرجع المنتخب الوطني المغربي لأجواء التداريب غدا الخميس، من بعدما يكونو اللعابا رتاحو، وغادي يكون مطلوب من جميع المكونات ديال ليكيب ناسيونال الاجتهاد، خصوصا من الجانب البدني واسترجاع لافريشور فيزيك، خصوصا وأن الخصم ديالهم فربع نهائي كأس العالم منتخب البرتغال لعب غير 90 دقيقة فثمن نهائي المونديال، وكان مرتاح بدنيا فالماتش ضد سويسرا، حيث حسم التأهل بكري وبقى غير كيجيري فدقائق المباراة اللي سالات بنتيجة 6 لواحد، مع العلم أن كريستيانو رونالدو القوة الضاربة ديال البرتغاليين ما دخل حتى الدقيقة 74 وما دارش شي مجهود يقدر يأثر على اللياقة البدنية ديالو، حيث مدرب البرتغال كان معول بلي الماتش ضد سويسرا غادي يكون صعب من اللي كان عليه فالواقع، وفضل يبركو فالاحتياط باش يكون حاسم فالشوط الثاني أو فالشوطين الإضافيين فحالة وصلو لهم.

موضوعات أخرى

29/01/2023 00:00

ماتت وما تسوق ليها حد.. بوليس بريطانيا لقا هيكل عظمي ديال امرا كانت مريضة وبعيدة على عائلتها

28/01/2023 22:00

الأهلي المصري وصل للمغرب باش يلعب الموندياليتو.. واللعابا فرحانين حيث المغاربة كبرو بهم فالاستقبال – تصاور

28/01/2023 21:30

“كود” جابت حقيقة وفاة جوج طالبات فوجدة: ماشي طالبات ووحدة مازال فغيبوبة والثانية كتهضر وفحالة صحية عادية

28/01/2023 21:00

“كود” جابت حقائق خطيرة على هرب اللاعب الجزائري بن العمري والمخابرات الجزائرية وراء رحيلو من المغرب