عن وكالات////

زاد صداع بين أمريكا وفنزويلا نهار 28 نونبر 2025 من بعدما الرئيس دونالد ترامب هدد بأن الجيش ديالو غادي يقرب بزاف من فنزويلا باش يحارب لي سماه “شبكات المخدرات”. هاد التهديد جا فمكالمة ديال عيد الشكر، وتبنّى فيه ترامب العمليات البحرية اللي بدات من 1 شتنبر 2025 فالكاريبي، واللي قال بلي تدمّر فيها أكثر من 20 زودياݣ أغلبهم فنزويليين وخلات أكثر من 80 وفاة.

فردّ مباشر، الرئيس الفنزويلي نيكولاس مادورو دار نهار 27 نونبر 2025 استعراض عسكري كبير بمناسبة 105 سنة ديال تأسيس الطيران الحربي، وطلب من الجيش يبقى فحالة تأهّب، حيث كيشوف التحركات الأمريكية محاولة حقيقية لإسقاطو. وزير الدفاع فلاديمير بادرينو لوبيز زاد هاجم الدول لقال بلي “راكعين” وكيعاونو فخطط واشنطن فالكاريبي.

الأزمة تزادت نهار 24 نونبر 2025 بعدما شركات طيران عالمية بحال Iberia وTAP وTurkish Airlines وAvianca حبسات الرحلات لفنزويلا من بعد تحذير أمني أمريكي. كاراكاس جاوبات بقوّة وسحبات التراخيص من هاد الشركات، واتهماتهم بأنهم منخرطين فـ“الإرهاب الاقتصادي” ديال ميريكان، مطار مايكيطيا ولى خدام غير بسبعة الرحلات داخلية وسبعة خارجبة فالنهار.

الدول الأوروبية تفاعلات بسرعة، فالبرتغال دارت تصريح فـ 25 نونبر كتقول فيه أنها ما غاديش تخضع للضغط بعدما تسحبات الرخصة من TAP، فحين Iberia عبّرات أنها ممكن ترجع غير إلا توفّرات السلامة. وبين التهديدات العسكرية وقطع الرحلات، بانت الأزمة بحالا داخلة فمرحلة أخطر، مع تحركات كتقرّب الكاريبي من مواجهة مفتوحة.