أنس العمري-كود//

حجز الحرس المدني الإسباني مجموعة ديال الأسلحة النارية اللي كيتوقع تكون جات من المغرب، وكانت عند أفراد شبكة إجرامية حاولت توسّع نشاطها فجهة هويلفا، فإطار تمديد شبكات تهريب المخدرات لهاذ المنطقة بعدما تزاد الضغط الأمني فالجزيرة الخضراء ومضيق جبل طارق.

وحسب ما نشرته جريدة “لاراثون” الإسبانية، اليوم الأحد، جوج ديال العصابات إجرامية تلاقاو فشاطئ خالي فبلدة مازاغون، فعملية ديال تهريب المخدرات شارك فيها قرابة 40 شخص من المغرب وإسبانيا.

دوريات الحرس المدني كانت كتراقب الساحل، وشافو التحركات ديال المشتبه فيهم، الأمر اللي خلا القارب اللي كان محمّل بالحشيش يهرب بسرعة فالـبحر، بينما المشاركين فـ العملية هربو وخلاو وراهم أسلحة نارية، من بينها بندقية هجومية.

ومن بعد، بدات الشرطة القضائية فـهويلفا تحقيق معمق، خصوصا وأن المنطقة ولات كتعرف نشاط متزايد ديال شبكات تهريب المخدرات اللي هربات ليها من الجنوب بسبب المراقبة المشددة.