الرئيسية > تبركيك > مقتل مغربية ف بروكسيل ف ظروف مرعبة وسط الزنقة قدام ولدها..و مغاربة بلجيكا كاعيين
02/06/2021 14:00 تبركيك

مقتل مغربية ف بروكسيل ف ظروف مرعبة وسط الزنقة قدام ولدها..و مغاربة بلجيكا كاعيين

مقتل مغربية ف بروكسيل ف ظروف مرعبة وسط الزنقة قدام ولدها..و مغاربة بلجيكا كاعيين

كود- بروكسيل//

نهار الاحد الفايت تعرضت سيدة مغربية اسمها مونية وأصلها من مدينة احفير لعملية طعن من طرف شخص مجهول ف شارع  بلدية ايفير ف بروكسيل.

السيدة في عمرها 36 عام و عندها ثلاثة الاولاد..وملي تعرضات لهاد الطعن كان معها ولدها ف عمرو عامين ف البوسيت.

الجيران ملي شافو الجريمة حاولو يسعفوها ولكنها توفيت ف السبيطار و الطبيب قال انها تعرضات ل7 طعنات في الرقبة باَلة حادة.

ولدها الصغير ماتعرضش للخطر و تم حمايته من طرف المارة.

و شي شباب من بينهم سائق طاكسي طاردو المجرم ولكن ماشدوه. وبعد دقائق حضرات الشرطة و المروحية بقاو كايلقبو حتى لقاو المجرم غير بعيد عن مكان الجريمة.

السيد اسمه أندي و فعمره 21 سنة ويسكن بلدية اندرلخت وهو من دولة افريقية جنوب الصحراء، غالبا الكونغو..وحسب ماقال وكيل الملك  انه شخص مختل عقليا و سبق ليه دوز مدة كبيرة ف سبيطار الامراض العقلية و كل مرة كايطلقوه كايتعدا على الناس.. و كانو سجلو ضده اكثر من 20 اعتداء. وهاد المرة من سوء حظ المغربية مونية انها جات قدامه..

بعد انتهاء التحقيقات، غالبا غادي يتحاكم ف القضية الطبيب و القاضي اللي سمحو لهاد المختل الخطير يخرج من السبيطار و يتم تعويض عائلة الضحية.

الحادث صدم بزاف سكان البلدية الصغيرة اللي حطو الورد ف مكان الحادث ومن بينهم عمدة البلدية ذو الاصول المغربية حتى هو، رضوان شاهيد،  و الجالية المغربية حاليا  كتعرف غليان كبير وكايتسناو اجوبة من طرف العدالة حول دوافع الجريمة، مزال ماقتنعوش ان السيد مختل عقليا و بعضهم قال ان الدافع عنصري معتقدين ان المجرم بلجيكي ابيض. خصوصا و ان بلجيكا كتعرف حاليا تصاعد كبير للعنصرية بعد هروب جندي منذ اسابيع وهو ينتمي لليمين المتطرف و كايهدد الاجانب وخصوصا المسلمين و العرب و ايضا بعد اكتشاف عناصر عنصرية وسط شرطة بروكسيل و ف البومبية..

من بين اكبر الجرائم العنصرية اللي صدمات المغاربة  ف بلجيكا هي حادث مقتل حبيبة و احمد يزناسي قبل سنوات ف سكاربيك من طرف جارهم البلجيكي الشيباني اللي ينتمي لحزب عنصري.

السيدة مونية تم دفنها اليوم ف مقبرة اسلامية ف بروكسيل وسط حضور كبير لاعضاء الجالية المغربية.

موضوعات أخرى

23/06/2021 13:30

سفير المغرب فـ الأمم المتحدة بجنيف عطى القاصح لممثل عسكر الدزاير: كلامك بئيس ودعمكم لـ شخص متابع بجرائم التعذيب و الإغتصاب شوهكم فـ العالم

23/06/2021 13:00

التامك قصف الأمين العام لمراسلون بلا حدود: الدفاع على الريسوني والراضي وتغييب حقوق المشتكين احتقار للعدالة المغربية واستقلالية القضاء.. وحتى تتقاد منظمتك اخلاقيا عاد تجي تعطينا الدروس