كود – euronews//

لبارح ففرنسا، نائب من حزب التجمّع الوطني خرج بمقترح باش يرجع ديور البغو ولكن فصيغة جديدة مهنية، بعيدة على الصورة القديمة، النائب كيقول إن القانون ديال 2016 لي كيجرّم لكليان زاد عمّق الأزمة وخلا العاملات يدورو فزناقي والبرد والظلام بلا حماية، داكشي علاش كيقترح يديرو بلايص بنظام تعاوني تكون فيه الخدمة اختيارية، والمنخرطات هُمّا ماليات الشي.

النائب جان-فيليب تانغي قال إن القانون الحالي خلق واحد النفاق، الدولة كتقول إنها كتحارب الدعارة ولكن على الأرض مكاين غير الخوف والعنف، وعاود أنه شاف بعينيه فغابة بولونيا حالات خطيرة: العصا، والتهديد، وجرائم بلا ما شي حد يهضر، هو كيعتقد أن النموذج التعاوني يمكن يحرّر العاملات من الوسطاء ويعطيهم سلطة على خدمتهوم.

المشكل الكبير ففرنسا هو أن حتى الحساب البنكي المهني للعاملات كيتعتابر شبه ممنوع، واللي كيكري ليهم دار كيتصنّف قوّاد. هنا كيبانو الناس اللي باغين يبدلو القانون وكيستدلو ببلجيكا لي دارت نظام جديد ناجح ف 2024. ولكن من جهة اخرى، معارضين كيشوفو أن هاد المشروع صعيب يدوز، حيث المجتمع والسياسة منقسمين وماباغينش يتحمّلو مسؤولية رجوع ديور البغو.