گود سبور//

كايبان أن حملة المقاطعة اللي دايرينها جماهير الوداد والرجاء الرياضيين، للديربي يوم السبت المقبل غايكون عندها تأثير كبير على الحضور الجماهيري فستاد دونور.

ومن خلال الجولة اللي دار جورنال “گود”، اليوم الخميس وقبل يومين من موعد الديربي، تبين ان الإقبال على سحب التذاكر ضعيف، فبحال مثلا الگيشي ديال تيران البيرجيگو فيه صيف واحد من الجمهور والعدد ديالهم قليلة، أما تيران بنجلون مقر الوداد وتيران الوزيس مقر الرجا فالگيشيات ديالهم خاويين كتيصفرو بحالا ما كاينش شي ماتش گاع عند الفرق ديالهم.

هذه الحملة ديال المقاطعة اللي انتشرت بشكل كبير على مواقع التواصل الاجتماعي ومتبنياتها الألتراس ديال الوداد والرجا ومنخرطين فيها جمهور الفريقين، كاتخلي المتتبع يطرح سؤال على محتلف المتداخلين فالكورة المغربية عن الاسباب اللي خلات الوداديين والرجاويين يدخلو فمقاطعة الديربي اللي هو اهم ماتش عند الفراقي بجوج وفالبطولة، من جميع النواحي، وخاص الإعلام يكون محايد حيث جميع الأطراف مغاربة ووطنيين واي مشكل بين المغاربة راه كايحلوه بيناتهم.

راه هذه المقاطعة إلى شفناها من مختلف الجوانب راه كاتعطي اشارات مهمة مزيانة لبلادنا، صحيح انها ممكن تمس بصورة الكورة المغربية والبطولة، ولكن من جهة اخرى ماتعطي فين وصلت حرية التعبير فبلادنا والديمقراطية، حيث حتى واحد ما يقدر يفرض على الجمهور يمشي للتيران صحا، او يمنعو ما يمشيش ما دام ان الامور ما فيهاش تهديد للأمن العام، ومن جهة اخرى، فهي فرصة باش جميع المتداخلين (جمهور وجامعة الكرة وعصبة احترافية والوداد والرجا والأندية الأخرى والسلطات) باش يگلسو ويعرفو الخلل فين كاين ويحلو المشكل، خصوصا وان المغرب مقبل على تنظيم تظاهرات كبيرة ومحتاج لكل واحد من ولادو للانخراط فإنجاحها وعلى رأسها كاس أفريقيا 2025 وكاس العالم 2030، وجمهور الوداد والرجا بين شحال من مناسبة روح الوطنية ديالو ومساهمتو فإنجاح التظاهرات الرياضية اللي كاتكون فالمغرب.