كود هناء ابو علي ///

جريمة اغتصاب وقعات البارح الاثنين 11 دجنبر 2023 بدار بوعزة بطلها شخص كيقدم راسو فنان “اوبي” عثمان. ب. القصة كما اكدتها ل. والدة الشابة ل”كود” بدات بعشا. هاد المغني اللي عايش فالامارات وملايري عندو سلطة وفلوس وكيخلع البوليس والجدارمية وكيقول باللي كلشي دايرهم فجيبو٬ من معارف العائلة “هادا راه صديق العائلة ماشي براني. كنعرفو والديه. كيجي للدار. هادي سنوات وهو فالامارات وباش دخل دار مكالمة بالفيديو نهار الاحد باش يبارك لامي عيد ميلادها”.

يعني من معارفهم ومزيان. وحدة من بناتها =عندها جوج= قالت لي البارح باللي غادية تخرج تعشى مع عثمان. ب. حقاش صديق للعائلة وكنعرفو باش كان صغير٬ قلت ليها مرحبا” تحكي الام ل”كود” وهي كتحبس دموعها وفحالة خايبة بزاف.
البنت قالت لماماها باللي بعد ما سالى لعشا٬ كان من المفروض يوصلها للدار٬ هو شد طريق دار بوعزة “كان غادي ب200 كلمتر فالساعة. لقيت راسي فبلاصة بعيدة. ما تسوق لا للغوت ديالي لا للتوسلات ديالي” تحكي البنت لامها حسب هاد الاخيرة ل”كود”.

وصلو للدار وطلعها بزز واغتصبها٬ حسب رواية البنت لامها. بعد ما تعدى عليها جنسيا تعدى عليها جسديا. “كود” كتوفر لصور هاد الاعتداء الهمجي. ثم اتهمها باللي شفرات ليه ماگانا. كانت البنت كتبكي وتغوت وقالت ليه راه يمكن نساها فالطونوبيلة. باش نزلات٬ بدات تغوت وتطلب الجيران يعطيو للجدارمية. ما تسوق ليها حد واخا فتحو الشراجم٬ يحكي مصدر “كود”. هادو راه يمشيو فيها بتهمة عدم تقديم المساعدة لشخص فحالة خطر.

من بعد غادية تهرب وتمشي عند العساسة. كانت الساعة الثلاثة دصباح هاد النهار الثلاثاء 12 دجنبر 2023. بقات 3 سوايع عندهم كلها ترعد والبرد زاد كرفصها بعد التكرفيصة ديال الاغتصاب والضرب.

دابا عائلة الشابة قدمات شكاية لجدارمية دار بوعزة ضواحي كازا. مشى باباها دابا عند الصبيطار باش يديرو معاينة وبعدها ياخذو شهادة طبية تثبت حالة الشابة مولات 19 عام يحكي مصدر “كود”.

العائلة ديال البنت باغية تطبيق القانون. خايفة ان نفود هاد الفنان “الحقير الحيوان”٬ كيف كيقول عند الجدارمية وغيرهم٬ يخرج منها. خايفين لا يهرب من المغرب اليوم قبل غدا. باغيين تطبيق القانون.