كود – وكالات //

توفات الفنانة الهندية Asha اليوم الأحد فمدينة مومباي،على 92 عام، ، آشا كانت من أشهر المغنيات فـ بوليوود، وصوتها بقى لاصق  فذاكرة السينما الهندية .

آشا بهوسلي فنانة و مدرسة بوحدها حيث ف 70 عام، غنّات كثر من 12 ألف أغنية وبزاف ديال اللغات، وخلّات بصمة قوية فموسيقى الأفلام الهندية، خصوصاً فـ السبعينات والثمانينات.

رئيس الوزراء الهندي Narendra Modi عبّر على الحزن ديالو، وقال باللي المسيرة ديالها كانت استثنائية ، وأثرات فالثقافة الهندية وخلات إرث كبير غادي يبقى للأجيال الجاية.

آشا تزادت فـ 8 شتنبر 1933 وسط عائلة فنية، وبدا المشوار ديالها وهي صغيرة مع ختها الكبيرة Lata Mangeshkar، اللي حتى هي كانت أسطورة فالضومين وتوفات فـ 2022.

اللي ميّز آشا هو التنوع ديالها، حيت كانت كتغني كلشي من البوب حتى للفولك، وكانت كتجرب رياتم جديدة ،حتى فآخر السنوات، بقات حاضرة وغنات مع فرقة Gorillaz فواحد الألبوم جديد.