أنس العمري -كود///

مغربي متهم باختلاس حوالي 750 ألف يورو كان كيظن أنه يقدر يهرب من العدالة ويتخبى فإسبانيا. لكن الحرس المدني شدو، قبل أيام، فجيرونا، منفذين مذكرة توقيف دولية قرباتو باش يتسلم للمغرب.

وسالات ملاحقة المعني بالأمر في ماسانيه دي لا سيلفا. وهو شخص عندو 38 عام، كان هدف رئيسي للإنتربول والقضاء المغربي. وسدات عملية إيقافه ملف ديال واحد متهم بسلسلة من عمليات الاحتيال الكبيرة اللي وصلات الخسائر ديالها لـ748 ألف أورو.

وهرب المشتبه فيه من المغرب بسرعة باش يفلت من التحقيقات اللي كانت مفتوحة عليه، وملف القضية ديالو فيه عمليات احتيال استهدفت بزاف ديال الضحايا فالمملكة.

الهروب ديالو خلا السلطات تصدر مذكرة توقيف دولية وطلب تسليم فبداية عام 2024، لكن التعاون بين الأجهزة الأمنية فالمغرب وإسبانيا خلاهم يحددوا بلاصتو فكتالونيا.

وتدارت العملية، أخيرا، حيث وحدة الشرطة القضائية فجيرونا، بدعم الشرطة المحلية، شداتو بلا مشاكل. ومن بعد، ضباط الشرطة دارو مسطرة التقديم مباشرة للمحكمة، لحسم مصيره أمام العدالة.