هشام اعناجي -كود مالاگا//

وقعت حادثة مثيرة اليوم الثلاثاء حدا أوطيل “إيبيس” فمدينة مالاگا الإسبانية، بعدما حاولات عصابة تسرق سيدة وتحيّد ليها السلسلة ديال العنق. غير أن التدخل الشجاع ديال شاب مغربي، ما خلاش هاد الشفافة يكملو مخططهم.

المغربي، اللي كان راكب على البكالا، شاف المشهد قدام عينيه وما ترددش، نزل بسرعة ودخل يواجه العصابة، الشي اللي خلاهم يهربو وسط اندهاش الناس اللي كانو حاضرين.

فيديو وثقتو شابة مغربية من اوطيل فمالاگا، تعطا للبوليس الاسباني.

شاهدة من أصل مغربي، شافت الواقعة، ساكنة 15 سنة ف مالاگا، أكدت لـ”كود” أن أغلب المهاجرين المغاربة والساكنة فمالاگا مسالمين ومتعايشين، وأن هاد النوع ديال التصرفات كيجي غالباً من بعض الأشخاص اللي ما كيمثلوش لا المغاربة ولا الإسبان.
واوضحت الشاهدة، بلي تواصلو معها الامن الاسباني، وهي لي عطاتهم الفيديو، واكدو ليها بلي غادي يشدوهم بسرعة، واخا هربو وخلا طوموبيل ديالهم تما.
هاد الواقعة، اللي طرات فوسط المدينة، كتعكس نموذج ديال الشجاعة ديال المغاربة، للي عندهم قصص بطولية ف عدد من الدول الاوربية.

المغاربة كيشكلو جزء من النسيج الاجتماعي فإسبانيا، فالتعايش والاندماج، وبالمقابل كيحاربو أي صورة سلبية على المهاجرين، واخا شي وحدين كيسيئو للبلاد بتصرفات هرگاوية او بالسرقة احيانا.