كريم الصوفي – كود//
قالت تقارير إعلامية، أن شاب من أصل مغربي، كيبلغ من العمر 21 عام، ومصاب بشلل فـالأطراف السفلية، تيرا بالقرطاس فـواحد من “لاگواريا سيبيل” بمنطقة ميخاس، وجاب القرطاسة فرجلو وهزوه للصبيطار.
الشاب عندو سوابق متعددة بحال الاعتداء على راجل مو بجنوية فـ 2020 والاشتباه فـعلاقتو بجريمة اختطاف فـ 2021. وتصاب بالشلل بسباب تبادل لإطلاق النار مع شخص آخر. جات فيه 4 ديال القرطاسات والخامسة فـ عموده الفقري.
وحسب التقارير ذاتها، جاو عناصر “لاگواريا سيبيل” لمنزل الأسرة باش يشوفو الصداع اللي كاين، بعدما أقدم على تهديد الأسرة ديالو بسلاح ناري وغير دخلات فرقة من “لاگواريا سيبيل” بدا كيضرب عليهم القرطاس..
