كود الرباط//
عكس الأعياد السابقة، غابت مظاهر الاحتفالات بالعيد الكبير هاد العام، نقصو تصاور ديال الجلالب والتكاشط فالفايسبوك والانستغرام وحتى أجواء تشواط ريوس فالشوارع نقص بزاف كيف عاينت “كود” بعدد من الإقامات نواحي تامسنا والصخيرات.
عدد من الأسر فضلو ما يذبحوش، حسب عدد من الشهادات من مواطنين لـ”كود”، منهم بنات مستقلات مهنيا فضلو يبقاو فكازا بلاصت ما يمشيو يعيدو مع عائلاتهم.
واحدة من اللي معيدوش مع عائلاتهم، (ف.) لي قالت لـ”كود” بلي كتفضل تبقا فكازا حيث خدامة الثلاثاء، وبلي هاد المرة مغاديش تعيد من دارهم وهادشي مزيان ليها من تكرفيص ديال العيد.
الاستقلالية المهنية ورفض التقاليد اللي فيها تكرفيص والاشغال نهار العيد، دفعت هاد البنت تاخد قرار باش متعيدش مع دارهم.
من جانب آخر، كاينين أسر فضلو ما يذبحوش الخروف نهار العيد، كاين لي عندو اسباب مالية معندوش القدرة باش يعيد وكاين لي اختار يدوز عطلة وكاينين اسر لي اصلا مكيعيدوش سنوات هادي، منهم أسرة تقطن فالهرهوة اللي مكيعيدوش هادي كثر من 15 سنة حسب فرد من الأسرة هضر مع “كود”.
الغلاء ديال اسعار الحولي وتكاليف العيد دفع كذلك أسر انها تمشي تشري اللحم من الجزار ولا فالاسواق الممتازة بلاصت ما يشريو الخرفان، باش طلع التكلفة اقل.
