كود الرباط//

المغاربة مقاطعين العيد، ماشي كلهم، ولكن نسبة مهمة، فمن غير السفر والوعي والازمة والخدمة بدات اليوم بشكل عادي، مؤشر آخر يؤكد بلي عدد من الاسر المغربية خصوصا فالمدن ما داروش ذبيحة العيد، هاد المؤشر هو قلة النفايات ديال الذبيحة.

عدد من المدن خصوصا الرباط وسلا وتمارة وفاس وكازا، قسم النظام داخل المجالس المنتخبة عندو معطيات تؤكد حسب مصادر “كود” أن حصيلة جمع مخلفات العيد، هبط بزاف وكاين مدن لي هبطات الحصيلة لناقص 50 في المائة مقارنة مع السنة الماضية.

مهم حسب التقديرات فهاد الايام ديال العواشر، نقصات كميات الازبال، وهادشي يؤكد على ارتفاع منسوب الوعي وزيد عليها كذلك بعض المجالس المنتخبة وزعوا ساشيات على الاسر بحال اكادير باش يكون تنظيم جمع الازبال.

فكازا مثلا تم جمع 12 ألف طن من الازبال فهاد اليوم ديال العيد هاد العام، ولكن في المقابل كاين تراجع كبير لهاد النفايات مقارنة مع السنة الماضية لي سجلت جمع 36 الف طن فيومين. نفس الشيء لعدد من المدن كاين تراجع بالنصف مقارنة مع العام لي فات.

سلا والرباط وفاس مثال لمدن عاشت انخفاض في نسبة ذبح الاضاحي في ظل الغلاء الفاحش للأغنام وفي ظل كذلك الاسر المغربية كتفضل  الاستمتاع بالأجواء الصيفية في مدن الشمال ومراكش وجنوب اسبانيا على الاحتفال بعيد الاضحى.