الرئيسية > آش واقع > مغاربة ماتو بالخلعة من بعد ما تزعزعات بيهم طيارة تابعة ل”لارام”.. ومسؤول ل”كود”: اعتارضاتنا سحب قوية وهذشي كيوقع لكاع طيارات فالعالم
27/01/2020 10:50 آش واقع

مغاربة ماتو بالخلعة من بعد ما تزعزعات بيهم طيارة تابعة ل”لارام”.. ومسؤول ل”كود”: اعتارضاتنا سحب قوية وهذشي كيوقع لكاع طيارات فالعالم

مغاربة ماتو بالخلعة من بعد ما تزعزعات بيهم طيارة تابعة ل”لارام”.. ومسؤول ل”كود”: اعتارضاتنا سحب قوية وهذشي كيوقع لكاع طيارات فالعالم

عفراء علوي محمدي- كود//

مجموعة من المغاربة كان غادي يسكت ليهم القلب، من بعد ما تعرضات الطيارة اللي راكبين فيها لاهتزازات اعتبروها “ماشي طبيعية”، وهذشي خلال مرورها على ارتفاع 12 لكيلومتر فوق البحر الأبيض المتوسط.

ركاب الرحلة AT0719، اللي انطلقات من مدينة ليون فاتجاه كازا، ماسكتوش من الغوات والبكى، وخصوصا منهم الأطفال، وكاين اللي سخف كاع من شدة الصدمة، بعدما حسو بانحراف الطيارة عن مسارها، واهتزازها بشكل كبير جدا، قبل ما ينزلو عليهم مضخات الأوكسيجين، ويزيدو يتخلعو كثر.

فالتعليق ديالو على هذشي، مسؤول من “لارام” قال، فتصريحو ل”كود”، بللي هذ الأمور طبيعية وعادية، وبللي الطائرة المعلومة دخلات فبؤرة مضطربة ناتجة عن تقلبات جوية ماكانتش متوقعة، وهذشي كيحصل فمعظم الرحلات اللي كاتكون فهذ الوقت.

وزاد المسؤول كيقول: “اعترضات الطائرة سحب كثيفة كانت سببا فالاهتزازات، ومعلوم أن جميع طائرات العالم كيوقع ليها بحال هكذا، وفالغالب الأعم مكايطرا والو، وكيوصلوا الركاب بسلام”.

واكد المسؤول ان المشكل اللي تقدر تتسبب فيه هذ الاضطرابات الجوية هو مشكل تأخر وصول الطائرة فالوقت المحدد “لكن فحالة الرحلة AT0719 الطائرة ماتأخراتش، والمسافرين كلهم وصلوا بيخير وعلى خير”.

موضوعات أخرى