گود-فاس//

دوزو المواطنين ديال مدينة فاس عيد كبير مبرع البارح السبت 7 يونيو 2025، وهاذ الشي بفضل قرار الملك محمد السادس بألغاء ذبح الأضحية رعاية منو لظروف المغاربة وحرصا على قطيع الأغنام باش ما يتضررش، وعجبهم الحال حيث كان النقا والدنيا ما توسخاتش وبقات نقية.

وخرج جورنال “گود” للشارع ففاس، العاصمة العلمية، والمدينة اللي عندها جذور تاريخيّة واللي عندها كثر من 12 قرن، وسول الفاسيين على الرأي ديالهم فالعيد الكبير هذا العام بلا حولي وبلا ذبيحة، وكيفاش دوزو الأجواء ديالو، وقال المواطن الأول اللي سولو “كود” وعندو حوالي 68 عام: “القرار ديال الملك قرار صائب 100%، وحنا كمواطنين فرحانين ومبهجين وما كانش لوسخ فالشوارع وما كانوش المشاكل اللي كانو ديما نهار العيد مع الأضحية ها اللي كايتخاصم على قبل الگزار وعلى الزبل وعلى التشواط وغيرها، وكانو المضاربات، ولكن اليوم كان الوقار بين الناس وتبادلو الناس الزيارات، غير الحولي اللي ما كانش الله غالب، ولكن الفكرة كانت حسنة.. العيد هذا العام كانت فيه النظافة والراحة موجودة ودوزناه بخير بفضل القرار ديال سيدنا”.

المواطنة الثانية اللي فقلب المدينة القديمة ديال فاس، حتى هي بحالها بحال بزاف ديال العيالات المغربيات عجبها الحال حيث تهناو من الشقا ديال العيد الكبير وتمارة اللي كاتكون فيه، وقالت: “العيد الكبير هذا العام داز مبارك ومسعود بلا روينة  بلا تمارة بلا صداع، وسيدنا حن فينا بالقرار ديالو، راه شفنا بشحال كان ثمن الحولي فالعيد ديال العام اللي فات، وبغينا العيد الكبير يبقى هاكا ديما بلا روينة بلا تمارة”.

مواطن آخر شاب من مدينة فاس، حتى هو عاجبو الحال على كيفاش داز العيد الكبير فالمدينة ديالو هذا العام وخصوصا حيث كانت الدنيا نقية، وقال: “رتاحينا من الخنز ودرنا بالقرار ديال سيدنا والتزمنا كشعب مغربي وحنا كساكنة فاس كلشي فهم الرسالة ديال سيدنا اللي من ورا هذا القرار،  وكانشكرو ملكنا وكانتمناو له الشفا، ونتمناو أن بلادنا تزيد القدام خصوصا وحنا مقبلين على تنظيم تظاهرات كبيرة بحال كأس العالم، وما بغيناش نبقاو نشوفو مظاهر العشوائية فالشعائر الدينية، راه الدين والنبي وصاو على النظافة”.