الرئيسية > تبركيك > مغاربة عياو وتقهرو من السدان بسباب كورونا عاودو لـ”كود” همومهم ومتمنياتهم.. كسالة: عندنا امل ف الحكومة الجديدة تخفف الاجراءات
28/09/2021 08:00 تبركيك

مغاربة عياو وتقهرو من السدان بسباب كورونا عاودو لـ”كود” همومهم ومتمنياتهم.. كسالة: عندنا امل ف الحكومة الجديدة تخفف الاجراءات

مغاربة عياو وتقهرو من السدان بسباب كورونا عاودو لـ”كود” همومهم ومتمنياتهم.. كسالة: عندنا امل ف الحكومة الجديدة تخفف الاجراءات

هاجر شريد – كود//

فهاد الساعات كتسنا فاطمة وهي كسالة فواحد من الحمامات فالرباط بلاغ يعلنو فيه عن فتح الحامات، باش ترجع لخدمتها كيف قبل، وتقدر تعيل الاسرة ديالها المتكونة من اربعة افراد.

فاطمة بحالها بحال بزاف ديال المغاربة لي عندهم امل في الحكومة الجديدة باش انها تخفف من إجراءات الاحترازية لي بسببها بقات بلاخدمة، واضطرت انها تشتغل كخادمة فإحدى البيوت الى غاية فتح الحمامات باش تصرف على عائلتها. بنبرة الحسرة والغضب

قالت فاطمة في تصريح “لكود “: معرفتش هاد الناس واش مكيحسوش بينا، راه حتى حنا عندنا وليدات وخاصنا نصرفوا عليهم، خصوصا دابا مع اقتراب الدخول المدرسي عندنا مصاريف بزاف. مؤكدة ان عندها امل كبير في الحكومة باش تخفف من الإجراءات، وفي نفس الوقت تحسن من الوضعية ديال الناس لي خدامين في هاد القطاع. حسب تعبيرها.

ومن جهة أخرى، توضح خديجة وهي ام لجوج بنات في تصريح لـ”كود”: عيينا من هاد القرارات الارتجالية ديال سد حل، راه اثرت علينا وعلى ولادنا خصوصا من ناحية النفسية، بسبب هاد التشديد بحيث مقدرناش نسافروا ولا نخرجوا. وكتمنى خديجة حاليا من الحكومة الجديدة تكون متزنة في اتخاد مثل هاد القرارات المصيرية وماشي بحال الحكومة السابقة.

وتابعت: سمعنا بانه هذا الأسبوع غادي تخفف القيود، وكنتمنى يكون هادشي صحيح لأننا بصح عينا وتقهرنا. موضحة انه قربنا نوصلو للمناعة الجماعية، وحتى حالات الإصابة بالفيروس بدات كتراجع ماشي بحال قبل، وهادشي كافي في نظرها باش نقدروا نرجعوا لحياتنا الطبيعية.

امين وهو واحد من بزاف ديال شباب المغاربة لي عزيزة عليهم الرياضة والحرصين دائما لذهاب لقاعات الرياضية لممارستها، يقول في تصريح لـ”كود”: مبقيتش قادر اليوم نمارس الهواية لي كتعجبني كيف قبل بسبب هاد القرارات المفاجئة، وليت كنمشي مرة فشحال نجري شوية وصافي.

موضحا انه مخلص ستة اشهر ديال لاصال، وانه بحالو بحال كاع مغاربة عندو امل باش يتحلوا لاصالات وترجع الحياة كيفما كانت مع الحكومة الجديدة.

كتبقى هذه عينة من بين الكثير من المغاربة لي في قطاعات مختلفة كيطالبو بتخفيف من الإجراءات الاحترازية ضد كورونا، وفنفس الاتجاه البروفيسور عزالدين الابراهيمي هو أيضا ضم صوتو للناس لرفع الحجر الليلي.

موضوعات أخرى