الرئيسية > تبركيك > مغاربة اختارو يواجهو الفيروس بالساركازم والضحك. البوماضة الصفرا والحجابات والحبة السودة.. فيسبوكيون اكتشفوا أخيرا دوا “كورونا”
27/02/2020 11:00 تبركيك

مغاربة اختارو يواجهو الفيروس بالساركازم والضحك. البوماضة الصفرا والحجابات والحبة السودة.. فيسبوكيون اكتشفوا أخيرا دوا “كورونا”

مغاربة اختارو يواجهو الفيروس بالساركازم والضحك. البوماضة الصفرا والحجابات والحبة السودة.. فيسبوكيون اكتشفوا أخيرا دوا “كورونا”

عفراء علوي محمدي- كود//

ختاروا نشطاء مغاربة على مواقع التواصل الاجتماعي يضحكو شوية ويطنزو من بعدما اقترب فيروس “كورونا” للمغرب.

“فيسبوك” ولا عامر بالبيبليكاسيونات الساخرة على الفيروس، خصوصا بعدما تسجلات إصابة بيه فالجزائر، وعاد إصابات فإسبانيا، وفرانسا اللي ماتو فيها جوج، بلا ما نهضرو على إيطاليا اللي تجاوزو فيها عدد المصابين 370 واحد، وماتوا فيها لحد الآن 12.

الفيروس قرب للمغرب

واحد الفيسبوكية سخرات من هذ الوضع، وقالت فتدوينة ليها رافقاتها برسم لخريطة إقليمية اللي كتبين عدد الإصابات بالفيروس فكل دولة مجاورة للمغرب بللي: “بقات غا موريتانيا ونقولو “نحن محاصرون يا جورج..” ما العمل؟”.

ناشط آخر علق بدورو على اقتراب الفيروس من المغرب، وتساءل بسخرية واضحة، فتدوينة ليه: “واش عندنا خطة لمواجهة الوباء المحتمل والرهان منصب على الثوم والحرمل؟”

وفنفس السياق، ناس بزاف مشاو فهذ الاتجاه، مجموعة منهم اقترحو علاجات بديلة للقضاء على “كورونا”، وأكدوا بللي المغاربة ما غايغلبهمش الفيروس وهوما كيتوفرو على “البوماضة الصفرا” اللي كتعالج كلشي.

دوا كيقضي على كورونا

فيسبوكي آخر كيشوف بللي الفيروس عمرو يدخل للمغرب لأنه محصن مزيان، وبالتالي قدم نصيحة للجيران اللي جاهوم المرض فتدوينة ليه مرفوقة بصورة للبوماضة الصفرة عملاقة فوسط الساحة الكاتدرائية فمدينة ميلان الإيطاليةد كيقول فيها: “الناس ديال الطاليان والجزائر الحل أمامكم فماذا تنتظرون؟”

من جهتو قال فيسبوكي آخر، فتدوينة ليه، بللي العشبة الكتامية كتقضي على كورونا، وقال للمتابعين ديالو: “اللي بغا الفيزا لكتامة عن طريق فاس أنا السبونسور ديالو”.

وفتدوينة خرى ديالو حط تصويرة ديال الشريحة مرقدة، وكتب عليها تدوينة كتقول: “هذا الدواء الفعال لفيروس “كورونا”. المكونات: شريحة ممتازة، زيت زيتون ديال هذ العام، زريعة كتامية من بني حمد، زعفران حر شعرا”.

واحد البودكاستر حتى هو علق بدورو، وبالنسبة ليه هذ الفيروس كي والو، حيت المغرب عندو دوا خطير يصلاح لكل دواء، واللي هو الحبة السوداء، وكيقول: “أصلا عندنا الحبة السودا ماعندنا مناش نخافو.. كنفكر نشد بيها جائزة نوبل للطب”.

الحروز والحجابات.. دقة بطلة

وماشي غير هذشي، “الفيسبوكيون” دارو حتى حرز باش يقضي على “كورونا”، ومن بينهم ناشط معروف بالسخرية ديالو من الرقاة الشرعيين.

هذ خونا عرض الحرز للبيع، ورفق صورتو بتدوينة كيقول فيها: “تعلن الرابطة الوطنية للرقاة الشرعيين والحجامة عن اكتشافها للتركيبة المضادة لكرونا… حرز واحد ب180 درهم، علبة 10 حروز ب1200 درهم…”

فيسبوكي آخر بدورو تكلم، فتدوينة ليه، على شي فقيه كيدير حجابات ضد كورونة غير ب100 درهم فتينغير.

موضوعات أخرى

09/04/2020 10:12

محمد السادس كاعي على كيفاش كتواصل هاد الحكومة مع لمغاربة. هاد الشي علاش طار عبيابة وجا امزازي وبداو الوزرا كيخرجو يشرحو ويوضحو

09/04/2020 09:17

سكوب. علاش ما قدرناش نرجعو لمغاربة اللي عايشين فالمغرب وحصلو برا. الخارجية لـ”كود”: ما نسيناهم وكنوجدو للترحيل وها المشاكل اللي اخراتو