الرئيسية > آش واقع > مع بداو العراسات الدجاج غلى.. ورئيس فيدرالية الدجايجية لـ”كود”: الثمن باقي هو هو والمربين مازال مقصحين بسباب غلاء الأعلاف وكورونا
08/06/2021 10:30 آش واقع

مع بداو العراسات الدجاج غلى.. ورئيس فيدرالية الدجايجية لـ”كود”: الثمن باقي هو هو والمربين مازال مقصحين بسباب غلاء الأعلاف وكورونا

مع بداو العراسات الدجاج غلى.. ورئيس فيدرالية الدجايجية لـ”كود”: الثمن باقي هو هو والمربين مازال مقصحين بسباب غلاء الأعلاف وكورونا

عفراء علوي محمدي- كود//

تداولو مواقع التواصل الاجتماعي، اليوم الاثنين، خبر ارتفاع أسعار الدواجن حتى ل16 لدرهم للكيلو.

هذشي نفاه شوقي الجراري، رئيس الفيدرالية البيمهنية لقطاع الدواجن بالمغرب، بحيث قال، فتصريحو ل”كود”، أن هذ الأخبار ماعندهاش اساس من الصحة، والأثمنة باقة كيف ما هي “بل على العكس الثمن نقص فالآونة الأخيرة”.

وزاد الجراري: “هنا فكازا، كان ثمن الدجاج كيتراوح بين 14 و14,5، الآن صبح بين 13 و13,5، بمعنى الثمن فالمارشي صبح قل، واخا كاين استئناف الأعراس والحفلات”.

وواخا هكذاك، ذكر الجراري بأن وضعية المربين ديال الدجاج باقية مامزياناش بسباب كوفيد 19 “كلفة الإنتاج مازالة طالعة، مع غلاء المواد الاولية والأعلاف اللي طلعات تكلفتها ب2,5 درهم، المستهلك خاصو يفهم الإكراه اللي كنعيشوه واللي خلا الثمن يطلع من 11 لدرهم ل13، وخاصو يعرف انه الى بغا الدجاج خاصو يخلص”، واعتبر ان 13 أو 14 لدرهم ماكافياش وفيها ضرر للمربين.

وكشف أن مجموعة من المربين بدلو الحرفة لأنها ماصبحاتش مربحة ليهم مع ازمة كورونا، وكاين اللي دار فاييت بعد ما خسر خسارة مبيرة، كيف كاين اللي توقف وعاد بدا النشاط ديالو مع استئناف الحفلات، و”المربين راهوم فالأصل مستثمرين وخاصهم يربحو فجميع الحالات”، على حساب هضرتو.

وكانت شرحات الفيدرالية البيمهنية لقطاع الدواجن بالمغرب، فبلاغ ليها للمواطنين علاش الثمن ديال الدجاج طلع فالسوق، وقالت أنها كتفهم تساؤلات المستهلك على الزيادة، لكنها كتطلب منو، فالمقابل يحس بمعاناة المربين اللي كاين بزاف منهم ضعفو انتاجهم حيت مابقاش ليهم وكاين اللي دارو فاييت.

وقالت الفيدرالية، فبلاغ ليها، أن المربين عاناو بزاف مع كورونا، من بعد ما سدو الريسطورات ولوطيلات والسويقات، والقطاع خسر 4 مليار درهم كلاو فيها المربين العصا كثر من أي حد آخر، خصوصا وأنهم تقصاو من دعم CNSS وبرامج “ضمان أكسجين” و”ضمان إقلاع”، وهذشي خلا الانتاج يضعاف ب40 فالمية.

موضوعات أخرى

15/06/2021 14:00

ما خرج به السفياني من ملاحظات بعد استقباله من طرف بشار الأسد! وجدنا بشار ونظام البعث ولم نجد العرب في سوريا