كود كازا//

معهد سرفانتس فكازا والسفارة الإسبانية فالمغرب، بتعاون مع مؤسسة Tres Culturas del Mediterráneo وJunta de Andalucía، غادي يقدمو العرض الاستثنائي “Tierra Bendita” ديال Ballet Flamenco de Andalucía، ضمن فعاليات المؤتمر العالمي للفلامنكو 2025 اللي كيتدار هاد الشهر فمدن مختلفة فالمغرب.

العرض غادي يكون نهار الخميس 30 أكتوبر مع العشرة دالليل فـ مسرح ستوديو الفنون الحية فكازا، وكيعطي الفرصة للجمهور المغربي باش يعيش تجربة فنية قوية وغنية بالفلامنكو الأندلسي.

الفرقة لي جاية من مناطق الأندلس غاتقدم أشهر الأغاني ديال”Tierra Bendita” العرض المسرحي غا ياخد الجمهور فرحلة فنية فيها الرقصات ديال الفلامنكو تحت إشراف باتريشيا غيريرو لي خدات جائزة الرقص الوطنية فإسبانيا باش تقدم تجربة بصرية وموسيقية رائعة.

هاد الحدث جزء من برنامج المؤتمر العالمي للفلامنكو، اللي كينتظم للمرة الرابعة فالمغرب، باش يروج لفن الفلامنكو كتراث ثقافي عالمي، ويقوي الحوار الثقافي بين المغرب وإسبانيا، ويحتفل بالروابط التاريخية والفنية اللي كتوحد بينهم.