كود الرباط//

قليل لي نتابهو مزيان البارح لكواليس ديك الحيحة لي دارها المستشار البرلماني يحفضو بنمبارك، عضو فريق الحركة الشعبية، أثناء جلسة المساءلة الشهرية لرئيس الحكومة بمجلس المستشارين.

المستشار الصحراوي بنمبارك، لي خدا الكلمة فبداية الجلسة وخرق النظام الداخلي للمجلس، بدا كيهضر فجلسة بالبث المباشر على قضية طلبات العروض لي دارتها وكالة التنمية الفلاحية لـ5000 هكتار فبئر إنزران فمدينة الداخلة.

البرلماني حيح مزيان وبدا بتوجيه انتقادات حادة للحكومة ولوزارة الفلاحة ولوكالة التنمية الفلاحية، ووجه اتهامات خطيرة للعديد من الجهات بالفساد والريع واستغلال النفوذ.. وكملها وجملها ملي قال بلي خاص ما أسماه “تحقيق ملكي” فهاد القضية.

رئيس الجلسة لي هو النعم ميارة، رئيس مجلس المستشارين، حاول يسكت المستشار يخفضو بنمبارك، لكن بدون جدوى. المستشار البرلماني كان غاضب بزاف.

وعلى إثر احتجاج أعضاء المجلس على خرق النظام الداخلي للمجلس من قبل هاد المستشار، هاد الأخير زاد نفاجر ووجه اتهامات لمستشاري الأغلبية بكونهم ساكتين على هاد القضية حيت حتا هوما مستافدين من الريع والفساد ديالها.

هنا غادية تشعل مزيان ملي تدخل واحد المستشار شاب من فريق التجمع الوطني للأحرار سميتو كمال أيت ميك لي ماقبلش تصرفات هاد المستشار واتهاماتو لأعضاء المجلس بالفساد والريع والاستفادة من صفقات مشروع الداخلة. المستشار التجمعي الشاب قال للمستشار الحركي: “ما منحقكش تقحم اسم سيدنا فهاد القضية، وإلى عندك شي مشكل، راه نتا برلماني وكاينين آليات رقابية أخرى بلا ماتخرق النظام الداخلي”.

المستشار الحركي زاد شعل وخرج من بلاصتو وبغا يضرب المستشار التجمعي الشاب وناضت الفوضى وفالأخير تدخل رئيس الفريق الحركي وطلب رفع الجلسة.

رئيس الحكومة عزيز أخنوش بقا كيتفرج فهاد المنظر وباينة عليه التقليقة بزاف.

فهاد القضية كاينة أسباب وأبعاد متعددة: أولها مشكل هاد 5 ألاف هكتار لي عين لوبيات العقار فالداخلة عليها. كولشي بغا يدي طرف منها. وثانيا، كاين صراع بين آل الرشيد فالعيون لي بداو كيشوفو المشاريع الكبيرة كتنزل فالداخلة وخايفين من صعود قوة الاستقلالي  ينجا الخطاط، رئيس الجهة، لي متحالف مع القطب الصحراوي الحركي الجماني، قريب المستشار يحفظو بنمبارك. هاد الأخير، وهذا هو البعد الثالث، بغا يطلع فتجديد هياكل مجلس المستشارين فأكتوبر المقبل لمكتب المجلس فبلاصت المهدي عثمون لي متابع فملفات قضائية. يحفضو بنمبارك بغا الدعم ديال الأمين العام الحركي محمد أوزين فهاد الترشيح، والأخير واخا جمد مؤقتا الانتقادات ديالو لرئيس الحكومة عزيز أخنوش، لكن مازال كيخوض ضده حرب بالوكالة عبر برلمانيين من المجلسين. وهاد الشي لي كيفسر مجيء محمد أوزين لمجلس المستشارين قبل انطلاق الجلسة مصحوبا بالمهدي عثمون ولقاءهما بالمستشار يحفضو بنمبارك فمقر الفريق الحركي. القضية يبدو أن فيها شحن ضد رئيس الحكومة.

إلى كان هاد التجادب بين المعارضة والاغلبية طبيعي ومحمود فكل الديمقراطيات، فراه خاصو يكون باحترام القانون والأعراف، وفوق من هاد الشي خاص يكون الحرص على عدم إقحام إسم سيدنا في المزايدات السياسوية بين الأطراف المتصارعة. ولي فعلا عندو شي ملف ديال خرق القانون والفساد والريع، خاصو يمشي للقضاء، ماشي يجي يعربد ويحيح فالبرلمان ولا يستغل المؤسسة التشريعية لتصفية حسابات حزبية وشخصية.

فهادي، راه رئيس المجلس النعم ميارة، وداك المستشار التجمعي الشاب أيت ميك عندهوم الحق فالتصدي للتصرفات اللامسؤولة ديال المستشار الحركي يحفضو بنمبارك.

القضية بكل تأكيد غا تزيد تكبر.. حسب مصادر برلمانية.