الوالي الزاز -كود- العيون///
أحرج معطلون رئيس جهة الداخلة وادي الذهب، ينجا الخطاط، خلال الدورة العادية لشهر مارس لمجلس جهة الداخلة وادي الذهب، المنعقدة البارح الاثنين.
وتدخلو المعطلين خلال انعقاد أشغال الدورة العادية لمجلس جهة الداخلة وادي الذهب، وسولوا رئيس الجهة: “أين المعطلين من الدورة؟ بغينا نقاش على المعطلين. من 2018 وحنا ننتظر”، حاملين لافتات تدعو لإيجاد حل لمعضلة البطالة فالجهة.
وأضاف المعطلون اللي حضرو الدورة: “إمتى غادي تهدرو على حق المعطلين؟ حتى لإمتى غاد يبقاو مهمشين؟ المعطلين عندهم حقهم فثرواتهم وغادي نبقاو نترافعو عليهم”، داعيين لـ”توفير حقهم فالعيش الكريم خاصة وأن المنطقة تزخر بمؤهلات كبيرة فالصيد البحري والفلاحة”، مضيفين “إلى متى التهميش”.
هاد التدخل أحرج بزاف رئيس جهة الداخلة وادي الذهب، الخطاط ينجا اللي ما عرفش شنو يقول وجاوب بأنه “ما عرفش علاش هادشي كيوقع فالجلسة”، وأضاف “إلى بغيتو نتلاقاو من بعد الجلسة نتلاقاو”.
ويذكر أن جهة الداخلة وادي الذهب تشهد بين الفينة والأخرى احتجاجات سلمية لعدد من المجموعات المعطلة للمطالبة بتوفير الشغل، خاصة فظل الأرقام الكبيرة المعلن عنها والاستثمارات اللي كيتم الترويج لها من طرف مجلس جهة الداخلة وادي الذهب.
موضوعات أخرى
