نجوى المالحي-كود//

غادي تنظم جمعية ريشة وفن “PlumArt” تنظم معرض فني جماعي فالمركب الثقافي أنفا فكازا، ما بين 25 يناير و10 فبراير.

فهاد المعرض غادي يشارك سبعة فنانين وفنانات تشكيليين، بزاف منهم عصاميين، وكيجمع ما بين مغاربة وأجانب مقيمين فالمغرب.

المشاركين غادي يعرضو لوحات تشكيلية متنوعة فالتقنيات، الألوان، المواضيع، والرؤى الفنية، بحيث كل واحد فيهم كيحمل أسلوب خاص.

الافتتاح غادي يكون نهار السبت 25 يناير مع 5 ديال العشية فقاعَة العروض فالمركب الثقافي أنفا فكازا.

هاد التظاهرة الفنية الهدف منها هو التأكيد أن “الفن كيجمعنا”، وخا كاين التنوع والاختلاف فالمجتمع المغربي والعالمي. وكتمثل فرصة باش الفنانين التشكيليين يتبادلو التجارب ويشاركو الإبداع ديالهم مع الجمهور.

المعرض كيجي ضمن الأنشطة السنوية اللي كتنظمها جمعية ريشة وفن “PlumArt”، اللي كتسعى تنشط الحياة الثقافية والفنية فالمركبات الثقافية والفضاء العام، وكتدعم الفن والثقافة باش تلعب دور فالتنمية على المستوى الفردي والمجتمعي.