كود سبور//
عناو بزاف المسافرين اللي جاو البارح فالعشية فالتران فالطراجي بين مدينة القنيطرة والصخيرات من توقف القطارات المستمر، وهذا الشي السباب ديالو محسوبين على جمهور الجيش الملكي.
وعاشو المسافرين فالقطارات ما بين مدينة قنيطرة والصخيرات على أعصابهم مساء الثلاثاء، ومن بينهم قطار جاي من مدينة فاس وغادي للدار البيضاء ودار الروطار بكثر من ساعة ونص على موعد الوصول ديالو، وكل مرة كيوقف بسبب فوضى شي مشجعين ديال الجيش الملكي اللي طلعو له من محطة القنيطرة.
محسوبين على جمهور الجيش الملكي دارو روينة فالقطار، ها اللي كيطلب الكونيكسيون وها اللي كيطلب الما، وها اللي كيطلب الفلوس، وعاد الإزعاج اللي دارو للمسافرين وحتى التحرش، وهاد الشي كيطرح مجموعة من علامات الاستفهام على مستوى الوعي عند واحد الفئة من المجتمع المغربي، اللي مازال ما استوعبت المشاريع الكبيرة اللي داخل فيها المغرب ومن بينها تنظيم كوب دافريك 2025 وكوب ديموند 2030.
للإشارة فالجيش الملكي لعب مع الوداد الرياضي الكلاسيكو البارح الثلاثاء ضمن منافسات البطولة الاحترافية، والماتش عرف حضور غير جمهور ليفار بقرار من السلطات وما جاش جمهور الوداد الرياضي.
