كود كازا ///

هاد اشغال توسيع الطريق بين كازا ودار بوعزة بدات وما علموش. دابا حتى واحد ما عارف وقتاش تسالي. كنهدر على لوحات كتشرح. اما فالتسويق الاعلامي راهم قالو 22 شهر او عام و10 اشهر.

المهم سكان هاد المناطق فرحو النهار الاول بهاد المشروع ولكن حول حياتهم لجحيم. شهادة مواطنة ساكنة تماك كتخلص هاد الوضع. نسميوها سليمة. ام لطفلة كتقرا وخاصها يوميا تنقل تديها.

البنت كتدخل مع الثمنية ونص لمدرستها. الام خاصها تخرج مع السبعة وربع. فالايام العادية وقبل بداية الاشغال كانت 20 ساعة كافياها. يعني كانت تفطر مع بنتها وتخرج وتسناها تدخل للمدرسة وترجع. اليوم كلشي تقلب.

ايلى كنتي جاي من دار بوعزة عندك ممر مفتوح ليك. عندك اكثر من ممر. اما ايلى رجعتي خاصك دير واحد الدورة عبثية. كان ممكن البوليس يخلي ممر اللي داخلين لكازا من دار بوعزة وممر للي راجعين لدار بوعزة “كلشي كيقلب غير على يدوز سربيسو بيخير. ما كيتسوقوش لمعاناة الاباء والامهات واللي خدام فكازا” تضيف سليمة فشهادتها ل”كود”.

سليمة كتضطر تخلي بنتها 40 دقيقة فالمدرسة. “دابا بنتي كتبقى 40 دقيقة فالمدرسة. كنسملها ليهم. مجبرة بسباب هاد الفوضى اللي كاينة. فالرجوع راه جحيم حقيقي” تضيف السيدة.

اما شهادة دوك اللي كيقريو ولادهم وسط كازا كليسي ليوطي ومدرسة خوان رامون خيمينس الصبليونية ومدارس اخرى فمقودة بزاف “باش تجنب المشاكل جبنا شيفور. كيوصل الولد للمدرسة مع الثمنية وربع وكيبقى يتسناه حتى الجوج” تشرح سيدة اخرى كيتقري ولدها فالمدرسة الصبليونية. يعني جايبة شيفور خدمتو يوصل البنت فالصباح ويرجعها مع الجوج.

لكن شي عائلات مع هاد الزحام كتشفات باللي شيفور عندها كيحط الولد وكيقلبها “كريم” او “اوبر” بطونوبيلة العائلة.

طبعا كاينة حتى معاناة الشيفورات. باش يكون مع السبعة ونص فكازا٬ كيضطهر محمد يخرج مع الستة. هادا ساكن فالضحى اللي حدا “العراقي”. ايلى بقيت حتى التسعود عندي ساعة ونص باش نوصل لوسط كازا.

توسيع الطريق غادي يكون فيه بناء 4 الانفاق باش تخفف حركة السير.

وغاديين يزيدو ڤوا. دابا كاين جوجت الممرات اللي غادي وجوج اللي جاي. المشروع فيه يزيدو وحدة باش تعود 3. من الاحسن كانو يديرو 4 لان الضغط غادي يستامر على هاد المنطقة. شوفو غير المشاريع للي كتنبت تعرفو اش كيتسناها.

هاد الاشغال فيها توسيع طريق ازمور وبالضبط فتقاطعها مع سيد الخدير وحتى تقاطع داك المحور الموازي للطريق الدائري الجنوبي الغربي ديال طريق ازمور. اللي مكلف بهاد الشي هو كازا اميناجمون “الدار البيضاء للتهيئة” وغادي يكلف 511 مليون درهم