كود سبور//

لاقيين جماهير الوداد الرياضي مشاكل وصعوبات مع البلاتفورم الجديدة ديال ليتيكي الخاصة بالنادي، وهذا الشي عكس اللي كانت باغياه ادارة الواك من هاد المنصة الالكترونية اللي تدارت لبيع تذاكر ماتشات الفريق، حيث كان الهدف منها هو توفير بيع التيكي بطريقة سهلة وسلسلة.

المعاناة ديال الوداديين مستمرة مع هاد البلاتفورم ملي بدا الاستخدام ديالها السبت الماضي، فأول استعمال لها باسم الوداد، و عدد من جماهير الواك اللي دخلو لها يقطعو التيكي ديالهم، وفبلاصة ما يكون خداو الروسي ومشاو يسحبو التذاكر وداروهم فالجيب باش يمشيو يوم الاربعاء يتفرجو فماتش الواك وانييمبا النجيري فالسوبر ليك، لقاو ريوسهم مضطرين يقلبو على واحد الرقم فالواتساب ديال المسؤوليين على البلاتفورم، باش يأنيليو لاكوموند ديال التذاكر اللي ديجا خلصوها بلاما ياخدو الروسي، حيث دازت لهم العملية وخلصو وتوصلوا بإشعار من تطبيق البنك ديالهم بأن ثمن التذكرة تقطع، ولكن ملي دخلو البلاتفورم باش يتيليشارجيو الروسي ديال التذكرة اللي يقدرو يسحبو به التيكي من الكيشي، كيعطيهم “satut paiement en cours”.

وبالتالي هاد الفئة من الوداديين لقات راسها مضطرة باش تقلب على رقم الواتساب ديال المسؤوليين على البلاتفورم وتدير أنيلي للعملية، باش يرجعو لها فلوسها وتحاول مرة اخرى تقطع تذكرة جديدة، وهذا الشي خلف توتر داخل جماهير الوداد الرياضي، خصوصا وان ادارة النادي كانت النية ديالها أنها تسهل عليهم باخدو التذاكر ديالهم وبسلاسة، ولكن كيبان أن هاد البلاتفورم اللي تم الاختيار ديالها ما مسلكاش فأول استخدام لها بإسم الوداد، مع العلم ان كاين فالوداديين اللي فايت خدم بها حيث كانت كتستخدمها شركة “كازا إيفنت” بدلو غير اللوكو وحطو ديال الوداد.