عفراء علوي محمدي- كود//

نشرات جمعية أقليات، فالصفحة ديالها على موقع التواصل الاجتماعي فيسبوك، تدوينة كتطالب فيها الدولة المغربية والجهات المسؤولة بالتدخل العاجل لإيقام الانتهاكات ديال حقوق الإنسان، بعدما جراو السلطات على بنت عابرة جنسيا سميتها الياقوت من إقليم، مشات تخدم فيه، فقط حيت الناس ماحاملينهاش.

وشافت الجمعية، فالتدوينة نفسها، أن هذ الفعل كيدخل فإطار التمييز والكراهية تجاه مجتمع “الميم – عين”، على اعتبار أنه كيتنافى مع ما صادق عليه المغرب من معاهدات دولية، وأنه  “من غير المقبول و غير القانوني طرد مواطنة من مقر عملها و سكناها من طرف السلطةالمحلية”، كيف قالت.

ودارت الجمعية هذ البوسط من بعد ما تواصلات بشكوى الياقوت، اللي كتقول أنها تحدات الفقر وانتقلات لواحد الإقليم باش تعيش بعرق كتافها فواحد القهوة شعبية، لكن اليوم فالصباح، جاو عندها خليفة القايد جماعة أمزو أكادير بوعشيبة نواحي العطاوية، باش يقول ليها أنه خاصها تمشي بحالها من المنطقة كلها، حيت السكان مكيستحملوش الترانس على أرضهم.