كود الرباط//

ف إطار معارضة الويكاند واستمرارا للأسلوب “القديم” ديال ال الفاسي على مر التاريخ، خرج نزار بركة، الأمين العام لحزب الاستقلال، بتصريح في لقاء حزبي بتازة هاد الويكاند، كيهاجم فيه الحكومة ف آخر سنة انتخابية، وخصص وقت باش يوجه اتهامات خطيرة لتدبير الحكومة للقطاع الفلاحي، واخا هو جزء من هاد الحكومة :

وقال بركة، فهاد اللقاء الحزبي (لي عامر بالعجزة وغابو عليه الشباب)،  قال بلي الإحصاء الأخير لي دارت وزارة الداخلية للماشية كشف عدد الكسابة الحقيقيين الذين يستحقون  الدعم…عكس السنوات السابقة بحيث كانو المضاربين كياخدو الدعم ديال العلف وكيعاودو فيه الثمن ويسمسرو.

وأضاف بركة مهاجما وزارة الفلاحة بـ: “باراكا من الغش… ولنستحضر الجدية والضمير الحقيقي للوطنية التي تربينا عليها في حزب الاستقلال”.

ودعا بركة إلى تغيير جدري في السياسة الفلاحية ببلادنا بالقول :”خصنا نديرو سياسة فلاحية مبنية على الواقع، ونضمنو نطورو القطيع الوطني. مباغينش ناكلو اللحم ديال اسبانيا والبرازيل  بغينا ناكلو اللحم ديالنا”.

فهاد اللقاء لي كان ف تازة، بركة هضر على الفقر والتنمية وتشكا من الفوارق المجالية والاجتماعية، وتكلم على جمعة بويبلان بلي فيها الفقر واصل ل 49 فالمائة.  يمكن هاد بركة من “ال فاسي” نسا بلي هو فالحكومة ومسؤول عمومي على السياسات اللي كتسبب الفقر والعزلة، خصوصا وأنه يدبر قطاع التجهيز والماء (الطرقان والسياسة المائية ).