وكالات//

النشطاء لي كيدافعو على حقوق الحيوان في بريطانيا منوضين الروينة وكيطالبو بإلغاء سباق القفز على الحواجز ديال الخيول بعدما ماتو 3 هاد السيمانة.

وعرفات النسخة الحالية من سباق “غراند ناشونال”-أحد أطول السباقات وأكثرها خطورة في العالم ولي كيتدار على مضمار أينتري- وفاة 3 العودان، هوما “دارك رافين”، و”إنفوي سبيشيل”، و”هيل سكستين”، وهاد الأخير قتلوه بالقرطاس بعدما تعرض لإصابات خايبة مكانش ممكن علاجها.

ووثقات مقاطع مصورة عبر المنصات حوادث اصطدام الخيول وكيفاش طاحت قدام حواجز السباق، حيت العودان بعض المرات كتفشل تنقز والخيل كيتصاطحو مع بعضياتهم.