كود – وكالات //

قالت جريدة نيويورك تايمز على لسان مسؤولين إيرانيين باللي المرشد الأعلى الجديد ديال إيران، مجتبى خامنئي، تضرب فرجليه بجوج نهار 28 فبراير لي فات، وقالت باللي هاد الإصابة ممكن تمنعو يبان قدام الناس.

وخا أن ولد الرئيس الإيراني مسعود بزشكيان صرّح باللي المرشد الجديد “بخير وبصحة مزيانة”، ما واضحش الظروف ديال الإصابة ولا شحال خطيرة ،حيت مجتبى ما بان حتى فشي فيديو ولا خرج يبان ولا دار بيان، من نهار تعلن مرشد أعلى جديد قبل ثلاثة أيام، من بعد ما تقتل باه علي خامنئي فضربة إسرائيلية مني بدات الحرب .

فمنشور فالقناة ديالو فـتليغرام، كتب يوسف بزشكيان مستشار حكومي:”سمعت خبر إصابة السيد مجتبى خامنئي، وسولت بعض الأصدقاء اللي عندهم معارف، وقالو ليا الحمد لله راه بخير وبصحة مزيانة”.

ولكن حسب نيويورك تايمز، نقلاً على ثلاثة مسؤولين إيرانيين، واحد من الأسباب اللي خلاو مجتبى يتخبا هو الخوف من أن أي اتصال ممكن يبين البلاصة اللي مخزون فيها ويعرضو للخطر، وزيد عليها الإصابة اللي عندو فالرجلين.

وقالو هاد المسؤولين باللي شخصيات كبيرة فالحكومة تعلمو أت مجتبى تضرب فرجليه بجوج ، ولكن واعي وتنقل لبلاصة محروسة بزاف، مع اتصالات محدودة.

وكتتوافق هاد المعطيات مع معلومات جمعاتها إسرائيل، اللي خلات المؤسسة العسكرية ديالها تعتقد أن مجتبى خامنئي تضرب فرجليه نهار 28 فبراير، وهو الاستنتاج اللي وصلو ليه حتى قبل ما يتم اختياره مرشداً  نهار الأحد اللي فات.

ومن بين المؤشرات على الحالة الصحية ديالو، أن التلفزيون الرسمي الإيراني ووكالة الأنباء الرسمية إرنا وصفوه بـ”المحارب المجروح” أو “”جانباز جانغ”.