فاطنة لويزا – كود

كنت كنتابع تفاعل الأحزاب مع المشاورات بخصوص الانتخابات البرلمانية، وبخصوص مشروع التنمية المجالية المندمجة، وانا نتفكر واحد الأغنية ديال العونيات: زيد أ الملك زيد زيد.
شنا هي العلاقة بين الأغنية وبين الأحزاب؟

العلاقة هي أني قبل أسبوع كتبت كننتقد هاد النزوع ديال الداخلية على التدخل في اختصاصات قطاعات أخرى، وعلى هاد الطلب من البعض على عودة الداخلية إلى زمن البصري، زمن أم الوزارات وأبوها وجدها.
واعتبرت أن هادشي غيخلينا نبعدو على الاختيار الديموقراطي لي هو ثابت دستوري.
وديك الساعة وانا كنكتب، كان في دماغي واحد التصريح كان عطاه المستشار الملكي عمر عزيمان لجريدة لوموند، هادي واحد العامين.
عزيمان كان قال بلي الملك بالفعل عندو طموح لنقل المغرب إلى ملكية برلمانية حقيقية، ولكن خاص تأهيل النخبة والأحزاب والمجتمع، بحيث كيما قال كاينفرق بين اقتناعات الملك الحداثية وبين وجود محافظة في المجتمع وداخل حتى النخبة والأحزاب.
ولذلك اعتبرت بعض ما تقوم به الداخلية، وبعض من يصفقون له هو على النقيض مما يريد الملك من تأهيل للمؤسسات والأحزاب باش تكون في مستوى الانتقال الحقيقي نحو الديموقراطية.
لكن فاش قريت مقترحات الأحزاب، وفاش شفت شلا مداخلات ديالمنتخبين في المجالس الجماعية في إطار المشاورات لي فاتحينها العمال والولاة مع الجماعات الترابية بغاية إعداد مشاريع تدخل في مخطط التنمية المجالية المندمجة، قلت مع راسي: اش دانا لشي ملكية برلمانية؟
وانا نتفكر أغنية العونيات: زيد أ الملك زيد زيد.
زيد في الملكية التنفيذية.
راها أفضل للشعب من تفويت صلاحيات أكبر للمنتخبين.
راه بصح، هاد الأحزاب يجهلوك، ويخليواك تكفر بكل ما قريتيه على الديموقراطية.
حنا خاصنا نظام المستبد المستنير ما فيهاش.
حيت  فاش كتشوف أحزاب مكيهمها غير مصالح المنتخبين الكبار ديالها، وكتشوف نخبة في الجامعة كتسمسر في الديبلومات، وكتشوف صحافة مشغولة بمواطنة حصلوها مع مواطن فدار سادين على راسهوم، او ما ضارين حد، وفاش تشوف جزء كبير من الشعب متبع عاد الفيلم، وكينهش في السيدة، لي مادارت حتى حاجة، غير مارسات حقها في الزهو، لي كيعجبنا كاملين.
فاش كتشوف هادشي كامل، والله متكره شي مستبد مستنير.
الحزب لي كيخدم مصالح منتخبيه الكبار، يهبط ليه الريدو، ويحلو، بلا حتى محكمة، والأستاذ الجامعي لي يحصل كيسمسر فالدبلومات، يعتقلوه من وسط لومفي وبالشوهة العالمية، والصحافة لي تدخل في الحياة الخاصة للناس يجلسوها على القرعة، باش تعلم تدخل سوق ____ها، وتخدم فقط على لي كيهم الناس، والشعب لي مبغاش يفهم أننا في القرن واحد وعشرين، ماشي في زمن الخوارج، حيدليه الجنسية وسيفطو لقندهار يعيش.
أستغفر الله العظيم، كيجهلوك.
واش أعباد الله، العامل معيط للمنتخبين يعطيو تصوراتهوم لشي مشروع كبير كتحتاجو المنطقة، ولي ممكن يخلق فرص شغل، ويحسن الوضعية، والمنتخبين ها لي كيدوي على البولات في درب مي عيشة، حيت تما كيترشح، ولاخور كيدوي على يديرو ترخيص استثنائي للناس لي بغات تبني عشة فالسطح، ولاخور كيدوي على توزيع كروسات ديال الببوش.
ما كاين لا تصور للمجال المندمج، ولا للالتقائية، ولا للتنمية المستديمة، ولا والو، كاين فقط تفكير كيفاش المشروعات لي غتصادق عليها الداخلية يكون فيها شي حاجة لي نقد نستثمرها في الحملة الانتخابية ديالي، أو فيها شي ميمي للشركات لي عندي.

وحتى في الاقتراحات لي تقدمت بخصوص الانتخابات البرلمانية.
فاش كان ضغط من المنظمات النسائية لرفع التمثيلية النسائية، وهادشيصعيب أن الأحزاب ترفضو، حيت كاين إرادة ملكية تدعمه. أش دارو؟
بدات أحزاب كتطالب بأنه الحل لرفع تمثيلية النساء إلى 133 مقعد هو رفع عدد أعضاء محلس النواب ب 100 عضو.
يعني بلا منحيدو للرجال ونعطيو للنساء، نخليو للرجال لي عندوم ونزيدو في العدد ديال أعضاء مجلس النواب.
مجلس لي قوانين هامة كيتم المصادقة عليها بحضور 50 واحد، وباغين يرفعوالعدد.
وماشي غير رفع العدد، كاين لي طالب بعودة لائحة الشباب، لي التجربة ديالها كانت بئيسة.
بغيتي الشباب حقيقة رشحهوم، بغيتي الشباب حقيقة عطيهوم يسيرو الحزب، ماشي نتوم مؤخراتكوم كبرات بكثرة الجلوس في كرسي رئاسة الحزب.
وكاين لي طالب بلائحة الكفاءات.
وهادو جابولي التمام.
بمعنى انهم ما غيرشحوش الكفاءات، الكفاءات خاصهوم كوطا.
هادا اعتراف انكم مكترشحوش الكفاءات.
فاش كتشوف بلي فأكتوبر كاين موعد حاسم في مجلس الأمن بخصوص قضية الصحراء المغربية.
فاش كتشوف نتائج الإحصاء العام للسكنى ولي كيقول بلي عدد المواليد كيتنقص مما يعني أننا مقبلين على الدخول في نادي الدول لي نسبة الشيخوخة مرتفعة فيها، مما كيطرح تحديات في قضايا التقاعد والخدمات الصحية .
فاش كتشوف مزال لينا أقل من خمسة سنوات على المونديال.
فاش كتشوف المؤشرات الاقتصادية العالمية خايبة بالنسبة لأوروبا لي دزءكبير من اقتصادنا الوطني مبازي عليها.
فاش كتشوف هادشي كامل، وغيره الكثير.
وكتشوف أحزابنا باش مشغولة، ما كتلقا غير تقول: زيد أ الملك زيد زيد.

راه ماكاينش مع من.