كود – إيموزار كندر//

خرج البطل العالمي السابق ورئيس جماعة إيموزار كندر، مصطفى لخصم، بفيديو من وسط كلينيك خاص من فاس، باش يطمن المغاربة على حالتو الصحية من بعد الأزمة الصحية اللي دازت عليه فالساعات اللي فاتت.

لخصم وجه رسالة شكر لجميع الناس اللي سولوا فيه، وقال بلي دابا فات مرحلة الخطر، وخا أنه باقي حاس بالعيا، من بعد ما خضع للعلاجات الضرورية وسط الكلينيك.

وحسب لخصم، فالسبب ديال الأزمة الصحية كان تسمم غذائي حاد، جا من بعد ما كلا شي ديسير بلا غسيل.

هاد الوضع خلاه يمشي ايرجونص للمستعجلات فمدينة فاس باش يداوا.

لخصم شكر التدخل السريع ديال الطاقم الطبي والتمريضي، وبالعناية اللي تلقاها وسط المصحة، وأكد أن حالتو الصحية دابا مستقرة.

لخصم بقات قدامو أيام قليلة باش يرتاح ، قبل ما يسترجع صحتو ويشارك فالحملة الإنتخابية مع حزب النخلة.