كود – ايموزار كندر //

تهز مصطفى لخصم، الرئيس السابق لجماعة إيموزار كندر، عشية اليوم الأحد، لواحد من الكلينكات ففاس، من بعد ما تكرفصات حالتو الصحية ودخل فحالة غيبوبة.

وحسب المعطيات اللي كتداول، لخصم حس من البارح بألم خايب فكرشو قبل ما تتطور الحالة ديالو للتقيا ويغيب بمرة.

مصادر متطابقة قالت بلي لخصم وصل للمؤسسة الصحية وهو فحالة صعيبة، ودابا كدار ليه التحاليل والسكانيرات الطبية، باش يعرفو السبب فهاد الحالة.

وفهاد الوقت، بدات كتروج فرضية تعرضو لتسمم غذائي، ولكن ما كاين حتى لدابا شي تأكيد طبي رسمي كيأكد هاد الفرضية أو كيحسم فسبب الأزمة الصحية.

وكان لخصم مشارك، نهار السبت، فنشاط عندو طابع انتخابي، قبل ما تبدا حالتو الصحية كتازم فالساعات اللي من بعد.

ودابا الأنظار موجهة لنتائج الفحوصات الطبية، اللي تقدر توضح طبيعة المشكل والسبب الحقيقي ورا الحالة الصحية ديالو.