گود سبور//

تقرر تخصيص ماتش مصر وايران ضمن دور مجموعات كاس العالم 2026 اللي غاتكون فـ الميريكان وكندا والمكسيك، كماتش ومناسبة للاحتفال ودعم المثلية، مع العلم ان القوانين فـ البلدان بجوج (مصر وايران)، كايجرمو المثلية بعقوبات قاصحة.

وكشفت شبكة Outsports أن اللجنة المنظمة لكاس العالم 2026، حددت موعد ماتش مصر يوم 26 يونيو 2026 فـ تيران لومن فيلد فـ سياتل، وهذا الشي بالتزامن مع نهاية أسبوع “الكرامة” فـ المدينة اللي كاتكون فيها احتفالات ومعارض فنية وثقافية على التنوع والشمول وان إقامة الماتش فـ هاد الموعد فرصة للاحتفال بالمثلية ومجتمع الميم.

اما جريدة Le Parisien الفرنسية، فـ قالت ان المنظمين ديال كاس العالم 2026، قررو ان هذا الماتش يكون مناسبة للاحتفال بالمثلية الجنسية وسماوه “ماتش الكرامة”، قبل أصلا ما تسحب القرعة ويتعرف شكون غادي يلعب هذا الماتش، وان الصدفة هي اللي خلات هاد المباراة يكونو الطرفين ديالها منتخبي مصر وايران اللي دولهم بجوج كايجرمو المثلية الجنسية.

ومن المنتظر تخلق هاد الخطوة جدل كبير، خصوصا وان مصر وايران كايجرمو المثلية الجنسية بالحبس فـ الأولى والإعدام فـ الثانية، ويقدر هذا الشي يخلق جدل كبير عند هاد الدول بجوج وللدول اللي بحالهم واللي حتى هما ضد مجتمع الميم، حيث ما يقدروش يقاطعو الماتش وإلا غاتعاقبهم الفيفا.