كود سعاد زرار القاهرة ///

بريسطو الباشا على النيل قبالة الجزيرة بالقاهرة كانت الدنيا عامرة. زحام كبير ليلة الخميس. هي ليلة الجمعة عندنا. حقاش ما كتخدمش الادارات العمومية نهار الجمعة. الباشا كاين فالطابق الاول على النيل. ايسباس متوسط يقدر يهز 200 زبون. ماشي كاباري ولا هو لاونج. ريسطو دالنشاط. تجديد لقصاير العوامات فالثمانينات فمصر. 

غير الديكور مختالف. كاينة عزلة فالدخلة. خاص حجز باش تدخل ليها او لبلايص لقريبة منها. لكيان كان ديك الليلة غالبتو العظمى من مصر. لهجتهم باش يهدرو بيناتهم والشطيح على اغانيهم كيبين هاد الشي. 

هاد الباشا ماشي هي الطوب فالمنطقة ولكن منظمة مزيان. هي صورة لمصر. واحدة من صور كثيرة كتمثل مصر. من الاحتجاجات اللي وقعات فميدان التحرير ف25 يناير 2011 فسياق الربيع العربي وطيحات حسني مبارك ف11 فبراير وبعدها جا حكم الاخوان المسلمين بعد فوزو بالانتخابات الرئاسية. فوز خلى هاد تيار الاسلام السياسي يتوغل وطيح مصر فازمة اقتصادية وسياسية وخرجات احتجاجات اخرى فالنصف الثاني من 2013 وسالات باعتصام اتباع الاخوان فميدان رابعة فالقاهرة وتدخل الجيش وفض هاد الاعتصام ومات 670 قتيل حسب وزارة الصحة المصرية وحتى 1000 حسب هيومان رايت ووتش وسماتو “اخطر حوادث القتل الجماعي غير المشروع فتاريخ مصر الحديث. وشد العسكر الحكم وبعد سنوات دارت انتخاباات رئاسية وربحها عبد الفتاح السيسي اللي زاد ولاية ثالثة سنة 2022 من 4 سنوات. 
لكن مصر خلصات الثمن بزاف. اطراف كثيرة دخلات. قطر كتدعم الاخوان والامارات كتدعم الجيش وامريكا مرة مع هادا ومرة مع داك. 

الحصيلة ان مصر دخلات فازمة كبيرة. بان هاد الشي فالعملة المصرية الجنيه اللي فقد غير هادي ثلاثة اشهر ثلث قيمتو امام الدولار. البنك المركزي المصري دخل ورفع اسعار الفائدة ب600 نقطة باش “يتحدد سعر الصرف “وفقا لآليات السوق”. دابا هاد ليام كيعرف الجنبيه استقرار نسبي. ثمنو هادي 3 اشهر مقابل الدولار كان 50.10 واليوم فاخر ماي كيدير 48 جنبيه.
هادا كيعطي صورة على بداية خروج مصر من نفق كحل عاشتو من 2011 حتى 2024. بداو مشاريع كبيرة بحال العاصمة الادارية اللي تعتابر مدينة من مدن الجيل الرابع وعاصمة جمهورية مصر العربية المستقبلية الجديدة وقادرة تستوعب 6 مليون نسمة ودابا واجدة لاستقبال 100 الف نسمة وغادي يكون فيها كاع مقرات الدولة من وزارات وادارات وكلتفها الاجمالية باش تسالي تقدر توصل ل64 مليار دولار واخا التوقعات الاولى حصراتها ف25 مليار دولار.
هاد الدينامية اللي فمصر كتبان فهاداك مطعم الباشا. شباب فيه رجال وعيالات كلهم كيشربو سوا البيرا سوا الڤان سوا الويسكي سوا الڤودكا. كلشي محترم. ما كاينش لقحاب ولا تصياد ولا تقواديت. كلشي خارج يسهر مع مراتو او صاحبتو. الموسيقى اللي كانت ديك الليلة اكثر من 80 فالمائة مصرية. ديال فنانين مصريين. الديجي مصري. الراقصة مصرية. تسويق رائع لابداع محلي وتجاوب كبير معاه.

كاين شي امور كتبان لينا غريبة بحال كل واحد كيجي للريسطو او غيرو وبغى يشرب٬ خاصو يجيب شرابو. المطعم كيتخلص على كل قرعة لفلوس يقدر يوصل غير باش تحط قرعة 30 دولار او اكثر اي 1400 جنيه. كثار يفضلو يجيبو قراعيهم ويخلصو ويعرفو اش يشربو عوض ما يشربو شي شراب مضروب او جودتو قليلة. 
صورة هاد اليلة فالباشا تعطي صورة زوينة على مصر اليوم. طبعا ما كتمثلش اش واقع فهاد البلاد 100 فالمائة ولكن هي جزء منو. مؤشر من مؤشرات كثيرة على اللي واقع فالبلاد. 

المنظمات الحقوقية الدولية كتعطي صورة قاتمة من وجهة نظرها على الحريات فالبلاد. كتلمس هاد الشي فتجنب المصريين للي تلاقاتهم “كود” فالحديث عن السياسة. كلشي باغي يهدر على امور اخرى الا السياسة. 

عندهم امل بلادهم تخرج من ازمتها الاقتصادية. تجاوز المحنة. هاد الشي ممكن تلعب فيه السياحة دور مهم. غير هاد القطاع خاصو خدمة كبيرة. كيفاش دولة بمآثر كتمثل الحضارة الانسانية بحال الاهرامات والاقصر بتاريخها لكبير وببنياتها التحتية بمدنها الساحلية بفنادقها لكثيرة فاشلة تجلب عدد كبير من السياح. مصر خاصها تكون قادرة تجذب على الاقل 40 مليون سائح سنويا. حشومة جزر البايلار فاسبانيا =14.5 مليون سائح سنويا= يزورها بحال اللي كيزورو مصر =14.9 مليون=. عقليات مازال كتعيق الوصول لهاد الرقم. شعب ناشط خاصو انفتاح اكثر. خاص اللي داز فديك الليلة بالباشا يكون طاغي على سلوك السكان. التسامح والاحترام والامن والامان. الامل كاين خاص غير المصرييين يثيقو فريسوهم وصافي. هاد لبلاد اللي فيها كثر من 110 مليون نسمة هي اللي قادرة ايلى نجحات هي٬ تخرج بلدان بحالها فاللسان والثقافة من الجهل والامية والتخلف. قادرة تتعايش فظل اختلافاتها الدينية