كود – وكالات//

قررت الحكومة المصرية تسد المحلات التجارية والريسطورات كل نهار مع 9 ديال الليل،هاد القرار دخل للتنفيذ من نهار السبت ، وخلّى بزاف ديال الشوارع فبعض المدن تغرق فالظلام، وهاد الشي جا باش يتنقص من استهلاك الضو.

هاد القرار غادي يبقا لمدة شهر كامل بسابب الضغط الكبير على الضو وطلوع ثمن الطاقة فالعالم، ومن بين الإجراءات لي دارت، انها حبسات الضو على الإشهارات فالطرقان، الضو نقصاتو فالزنقة وفالجوامع، تسدو الإدارات الحكومية مع 6 دالعشية،  وشجعات الخدمة عن بعد.

الدولة دارت حتى غرامات بقيمة 20 ألف جنيه لأي واحد ماحترمش القرار، وممكن حتى يتسد المحل ديالو ولا يتحيد ليه الترخيص، ومن بعد تطبيق القرار خرجو فيديوهات فالسوشيال ميديا كيبانو الشوارع مظلمين، وناس بزاف انتاقدو هاد الخطوة حيث ضربات الحركة التجارية، وكاين اللي طالب بحلول أخرى بحال الاستثمار فالطاقات البديلة.

وأكّدات المصادر باللي تكلفة إنتاج الضو فـمصر طلعات بـ30% من نهار بدات الحرب على إيران، وهاد الشي جا بسبب الغلا ديال الغاز السايل فالسوق العالمية، وزيد عليها توقّف الإمدادات ديال الغاز لي جايها من إسرائيل.

هاد الوضع خلا الحكومة كتفكّر فخيارات صعيبة، ومن بينها أنها تنقص فالضو باش تقدر توازن الوضعية.