كود سبور//

عكس داكشي اللي كايروج على مواقع التواصل الاجتماعي وفالشارع والقهاوي، فاستبعاد الدولي المغربي حكيم زياش من لائحة المنتخب الوطني المغربي لمواجهة كل من الگابون وليسوتو، ما عندو علاقة لا بداكشي اللي كاينشر فالانستغرام ديالو على فلسطين واسرائيل، لا والو من هذا الشي.

ووضح مصدر من المنتخب المغربي لـ “گود”، أن حكيم زياش لاعب گلطة سراي التركي، كان فاللائحة الأولية الناخب الوطني وليد الركراكي، استعدادا للماتشات ديال المنتخب المغربي ضد الگابون وليسوتو ضمن اقصائيات كاس أفريقيا 2025، ولكن وبحكم أن اللاعب ما كايلعبش مؤخرا مع الفريق ديالو وما واحدش بدنيا تقرر إعطاء الفرصة لأسماء اخرى باش تبين على الإمكانيات ديالها، وهذا الشي اللي كاين، والباب ديال المنتخب المغربي ديما مفتوح للاعب الجاهز سوا حكيم زياش او غيرو من اللاعبين.

وخرجو شي وحدين كايروجو شي هضرة بأن حكيم زياش ما كاينش فلاليست ديال المنتخب الوطني المغربي بسبب داكشي اللي كاينشر على مواقع التواصل الاجتماعي على فلسطين واسرائيل، ولكن تبين ان داكشي ما شي صحيح، مع العلم ان اللاعب يالاه بدا كايرجع يلعب وشارك فأخر ماتش مع گلطة سراي التركي قبل يومين وكان فيه احتياطي وما دخل لعب حتى الربع ساعة الاخيرة.